كۆمسیۆنا هه‌لبژارتنان رێنمایێن هه‌لبژارتنێن په‌ڕله‌مانێ كوردستانێ به‌لاڤكرن و راگه‌هاند، نابیت ب چ ره‌نگان هێمایێن ده‌وله‌تا ئیراقێ و هه‌رێما كوردستانێ د ریكلام و به‌لاڤۆكێن هه‌لبژارتنێن ئالیێن سیاسى دا هه‌بن.
ل گۆه‌ڕیى لقێ دهۆكێ یێ كۆمسیۆنا هه‌لبژارتنان هه‌وا هه‌لبژارتنان ل رۆژا ئێكێ یا پشتى په‌سه‌ندكرنا ناڤێن به‌ربژێران ده‌ستپێدكه‌ت و دێ تا به‌رى هه‌لبژارتنان ب 48 ده‌مژمێران به‌رده‌وام بیت.
هه‌روه‌سا دیاركریه، نابیت ب چ ره‌نگان كه‌رسته‌یێن كۆمسیۆنێ بۆ هه‌وا هه‌لبژارتنان بۆ هه‌ر ئالییه‌كێ سیاسى بهێنه بكارئینان.
ئاشكراكریه، نابیت هێمایێ ده‌وله‌تا ئیراقێ یان هه‌رێما كوردستانێ بۆ ریكلام و به‌لاڤۆكان د بانگه‌شه‌یا هه‌لبژارتنان دا بهێته بكارئینان و نابیت ژى ئاڤاهییێن وه‌زاره‌ت و فه‌رمانگه‌هێن میرى ژى بۆ بانگه‌شێ ژ ئالییێ حزب و به‌ربژێران ڤه بهێنه بكارئینان.
هه‌روه‌سا دیاركریه، نابیت فه‌رمانبه‌رێن حكومه‌تا هه‌رێما كوردستانێ ده‌ستهه‌لاتێن خۆ یێن وه‌زیفى و سه‌رچاڤین خۆ و ئامیرێن خۆ بۆ به‌رژه‌وه‌ندییا هه‌ر پارت و به‌ربژاره‌كى یان هه‌ڤپه‌یمانییه‌كێ بكاربینن.
ل گۆڕه‌یى رێنمایێن كۆمسیۆنێ نابیت به‌ربژار ل رۆژا هه‌لبژارتنان كارت و به‌رنامه‌یێ خۆ ب چ رێكان یان ژى ب رێكا هنده‌ك كه‌سان به‌لاڤ بكه‌ت.
نابیت فه‌رمانبه‌رێ حكومه‌تێ ل رۆژا هه‌لبژارتنان كارت و به‌رنامه‌یێ هه‌ر پارت و به‌ربژاره‌كى به‌لاڤ بكه‌ت، ئه‌ڤه ژى د ناڤا رێنمایێن كۆمسیۆنێ دا هه‌بوو.
كۆمسیۆنێ د رێنمایێن خۆ دا دیاركریه ناڤزاڕندن و ده‌ستدرێژى ل سه‌ر هه‌ر ئالییى، به‌ربژار و پارته‌كێ نابیت و دراندنا پۆسته‌ر و كرێتكرنا وان ژى ل دژى رێنمایانه.
ل گۆڕه‌یى رێمایێن كۆمسیۆنێ نابیت وێنه و رێكلام و پۆسته‌ر ل سه‌ر نیشانێن هاتنوچوونێ بهێنه بكارئینان و نابیت دیتنا شوفێران بهێته گرتن، هه‌روه‌سا نابیت ژى شوسته وه‌سا بهێنه بكارئینان كو رێك بهێنه گرتن و باخچه و كه‌سكاتى ژى بهێنه بكارئینان و سه‌روسیمایێ باژێڕى بهێته تێكدان.
هه‌روه‌سا دایه‌زانین نابیت ئه‌و كه‌رسته بهێنه بكارئینان كو به‌رمایێن وان وه‌ك سكۆتین، سپر، بۆیاغ و غرى ب دیواران ڤه بمینن و نابیت ژى ئاڤاهیێن حكومه‌تێ وه‌ك فه‌رمانگه‌هـ، قوتابخانه و زانكۆ بهێنه بكارئینان بۆ هه‌لاویستنا پۆسته‌ران و نابیت ژى پۆسته‌ر ل سه‌ر ئه‌نده‌رپاس، ئۆڤه‌رپاس و پرێن بلند بهێته دانان.
د دوماهى برگه دا كۆمسیۆن دیاردكه‌ت، ئه‌گه‌ر سه‌رپێچكار هاته تۆماركرن دڤێت د هه‌یاما 3 رۆژان دا بهێنه‌راكرن و به‌رۆڤاژى دێ سزایێ دوجارى ده‌ت و دێ پشتى دوماهى هاتنا بانگه‌شه‌یا هه‌لبژارتنان دڤێت ب زووتری ده‌م به‌رمایێن هه‌لبژارتنان بهێنه راكرن و ئه‌گه‌ر 30 رۆژ ب دوماهى هاتن دڤێت كه‌لوپه‌لێن بانگه‌شێ بهێنه راكرن و به‌رۆڤاژى دێ ژ پارێ به‌ربژاران هێته خه‌رجكرن.