غیاس خالد
ئاسته‌نگێن هاتینه پێش پارتى د چه‌ند به‌رپه‌ڕ و په‌ڕتۆكه‌كێدا ناهێنه ڤه‌گێران، چونكى پارتى دیموكراتى كوردستان د ره‌وشه‌كا تایبه‌ت و د ناڤ جڤاكه‌كێ تایبه‌ت دا یێ پڕ ئاسته‌نگ و ئاریشه هاته دامه‌زراندن، ژلایه‌كى ئاسته‌نگ و ئاریشێن سیاسى و ئابوورى, ژلایه‌كێ دیتر یێن جڤاكى و ره‌وشه‌نبیرى و ئێمناهى، دیسان دابه‌شبوونا خاك و خه‌لكێ كوردستانێ لسه‌ر وه‌لات و كلتوورێن دیتر و نه‌بوونا بزاڤ و شۆره‌شێن سه‌رتاسه‌رى و رێكخستى و رێبه‌ره‌كێ كاریزمایى بۆ درۆستكرنا ژێرخانه‌كا سیاسى و رێكخستیا ئێكگرتى بۆ كۆمكرنا كه‌سایه‌تیێن سیاسى و نشتیمان په‌روه‌رێن كوردستانێ لبن ئێك ره‌شمالا نشتیمانى و نه‌ته‌وایه‌تی ژبوو دارشتن و دانانا به‌رنامه و پلانێن بزاڤه‌كا شۆره‌شگێرى ل كوردستانێ كۆ پێتڤى یه‌كا وى سه‌رده‌مى بوو چونكى ده‌سپێكا گۆڕینێن نه‌خشتێ سیاسى یێ ده‌ڤه‌رێ بۆ پشتى بداوى هاتنا شه‌ڕێ جیهانیێ دوویێ و دامه‌زراندنا ئێكه‌م كۆمارا كوردستانى ل مه‌هابات و پارتیا دیموكراتا كوردستانێ ل رۆژئاڤایێ كوردستانێ كۆ ده‌رفه‌ته‌ك بوو ژبوورى دامه‌زراندنا پارتى دیموكراتى كوردستان ل باشوورێ كوردستانێ .
بارزانیێ نه‌مر وه‌كى كه‌سایه‌تیه‌كێ نشتیمانپه‌روه‌ر و جڤاكى و خودان ئه‌زموون و سه‌ربۆڕ، دناڤ ماڵباتا بارزان یا شۆره‌شگێر و نشتیمان په‌روه‌ر و ره‌وشه‌نبیر و ئایینى، لسه‌ر ده‌ستێ شێخ عه‌بدولسه‌لام و شێخ ئه‌حمه‌دى كو بهێزترین بزاڤ و شۆره‌شێن كوردستانى به‌رپا كربوون و ل سه‌رتاسه‌رێ كوردستانێ ناڤ و بانگ بوون و پشته‌ڤانیه‌كا به‌رفره‌هــ ژى هه‌بوون.
ژبوورى به‌رهنگاریا وان ئاسته‌نگا و پڕكرنه‌ڤا وێ ڤالاهیێ بازرانیێ نه‌مر ب باشترین و بهێزترین كه‌سایه‌تى هاته زانین بۆ دامه‌زراندنا پارتى دیموكراتى كوردستان بۆ رێبه‌ریكرنا بزاڤا رزگاریخوازیا كوردستان، كۆ وى ده‌مى پشتى بداوى هاتنا شۆرشا بارزان یا دوویێ بارزانى دگه‌ل ژماره‌گا شۆره‌شگێر و ئه‌فسه‌را به‌ره‌ڤ رۆژهه‌لاتێ كوردستانێ چۆبوون وه‌كى په‌ناگه‌هه‌ك و پشته‌ڤانیكرنا كۆمارا كوردستانى ل مه‌هابات .
هه‌رچه‌نده پارتى دیموكراتى كوردستان ل 16 ێ ته‌باخا سالا 1946 ب رێبه‌رى و سه‌رۆكاتیا بارزانى ل ده‌رڤه‌ى باشوورێ كوردستانێ و دناڤ زۆر ئاسته‌نگێن دژوار دا هاته دامه‌زراندن، لێ بارزانیێ نه‌مر ب شاره‌زایى و كاریزایى یا خۆ شیا وان ئاسته‌نگا ببڕیت و لسه‌ر زاڵ ببیت و هه‌ر زوو بوویه پارتیه‌كا رێكخستى و سه‌رتاسه‌رى و جهێ باوه‌ریا خه‌لكێ كوردستانێ و ئه‌و دوورى نه‌بوویه ئاسته‌نگ كۆ شانه‌یێن وێ بگه‌هنه گۆند و باژارێن باشوورێ كوردستانێ و چالاكیێن وێ گه‌هشتنه ده‌ڤه‌رێن جودا جودا یێن باشوور و ئیراقێ ب گشتى .