ل تورکیا هەر ژ ئەڤرۆ سپێدێ تۆرا جڤاکی یا ئینستاگرامی هاتییە بلۆککرن و دبیت ئەگەر پۆستێن گرێدایی حەماسێ بن.
ئەڤرۆ سپێدێ ل تورکیا ل دەما بکارئینەرێن تۆرا جڤاکی یا ئینستراگرامی بزاڤ دکرن وێ تۆڕێ بکاربینن، نامەیەک ژ سازییا پەیوەندی و تەکنۆلۆژیا زانیارییان یا تورکیا (BTK) بۆ دچیت و دبێژیتێ: ژ ئەڤرۆ سپێدێ رۆژا ئەینی دویی تەباخێ، هوین نەشێن بچنە د ناڤ ئینستراگرامی دا.
سازییا پەیوەندی و تەکنۆلۆژیا زانیارییان یا تورکیا هەر د وێ نامێ دا بکارئینەران ئاگەهدار دکەت کو ب بریارا سازییا پەیوەندی و تەکنۆلۆژیا زانیارییان یا تورکیا رێ ل بکارئینانا ئینستاگرامی هاتییە گرتن.
هەرچەندە تورکیا ب فەرمی ئەگەرێ راگرتنا ئینستاگرامی رانەگەهاندییە، لێ دبیت ئەگەر بۆ وێ یەکێ ڤەبگەریت کو پێشتر ل ئینستاگرامی پۆستێن گرێدایی ئیسماعیل هەنییە، بەرپرسێ مەکتەبا سیاسی یا حەماسێ هاتبوونە بلۆککرن، ژبەر کو ل گۆرەی سیاسەتێن مێتایێ، هەر کەسێ د لیستێن تیرۆرێ دا بیت، نابیت پۆست ل سەر بهێنە بەلاڤکرن و ئیسماعیل هەنییە ژی د لیستێن تیرۆرێ دابوو.