نێچیرڤان بارزانى، سه‌رۆكێ هه‌رێما كوردستانێ راگه‌هاند، دایكێن میهره‌بان یێن بارزانیان زێده‌بارى ئه‌نفالان لێ ل سه‌ر پێن خۆ راوه‌ستیان و زاڕۆیێن خۆ ب سه‌ربلندى په‌ڕوه‌رده‌كرن.
سه‌رۆك نێچیرڤان بارزانى دبێژیت: ئه‌ڤرۆ د یادا 41 سالییا ئه‌نفالكرنا بارزانییان دا وێ یادا هه‌شت هزار گه‌نج و زه‌لام و پیرێن بارزانى ل بیر دئینین كو ل 31-7-1983یێ د هه‌وه‌كا دڕندانه یا وى وه‌ختى یا ئیراقێ دا د كۆمه‌لگه‌هێن زۆڕه‌ملێ ل هه‌ولێری بیسه‌روشوین و كۆمكوژكرن، سلاڤ ل گیانێ وان یێ پاقژ و سه‌رێ رێز و نه‌وازشێ ل هه‌مبه‌رى وان د چه‌مینین و سلاڤان ل خێزان و كه‌سوكارێن وان دكه‌ین.
هه‌روه‌سا دیاركر، ئه‌نفالا بارزان وه‌ك هه‌موو تاوانێن دى یێن دیرۆكێ بۆ شكاندنا ئیراده‌یا گه‌لێ ئازادیخوازێ كوردستانێ بوو، به‌لێ بوو په‌له‌كێ ره‌ش ب ناڤ چاڤێن ئه‌نجامده‌ران ڤه، هێز و تێهنا زێده‌تر دا بزاڤا رزگاریخوازییا كورستانێ و دلێرانه‌تر به‌رهنگارى سته‌م و دكتاتۆریێ بوو.
سه‌رۆكێ هه‌رێما كوردستانێ هه‌ر د په‌یاما خۆ دا دوپاتكر، دایكێن میهره‌بان یێن بارزانى خۆ ل به‌ر هه‌موو ئێش و ئازار و ده‌رئه‌نجامێن خراب گرت و ل سه‌ر پێن خۆ راوه‌ستیان و شیان ب سه‌ربلندى زاڕۆیێن خۆ په‌روه‌رده بكه‌ن و نفشه‌كێ دلسۆز و ژێهاتى پێبگه‌هینن، سلاڤ ل هه‌موو وان دایك و هه‌ڤژین و خوشكێن هێژا كو د هه‌موو ئازار و ره‌وشێن سه‌خت و دژوار دا ده‌ستبه‌ردرارى خۆ نه‌بوون، ده‌ستێ وان ماچى دكه‌م.
نێچیرڤان بارزانى ل دوماهییا په‌یاما خۆ سوپاسیێن خۆ بۆ هه‌وو وان جوامێرێن د وان رۆژێن سه‌خت دا یێن هاریكاریا لێقه‌ومیێن بارزانى كرى كر و گۆت: خزمه‌ت و دلسۆزییا وان چو جاران ژ بیر ناچیت، دڤێ یادێ دا دوپات دكه‌م كو كار و بزاڤێن مه بۆ ساندنا ئه‌نفالا بارزانییان و كاره‌ساتێن دى یێن ب سه‌رێ گه‌لێ كورد هاتین وه‌ك جینۆساید ل سه‌ر ئاستێ نێڤده‌وله‌تى به‌رده‌وام بیت، دوپاتى ل ئێكرێزى و ته‌باى و پێكڤه‌بوونا ئالیێن سیاسى و پێكهاتێن كوردستانێ و قه‌ره‌بووكرنا كه‌سوكارێن ئه‌نفالكرییان كر.