سه‌رۆك مه‌سعوود بارزانى په‌یامه‌ك د یادا ئه‌نفالكرنا بارزانییان دا به‌لاڤكر و راگه‌هاند، ئه‌و تاوانێن ل دژى خه‌لكێ كوردستانێ هاتینه كرن ده‌رئه‌نجامێ عه‌قلییه‌تا شۆفینى و خۆسه‌پین و نه‌مارۆڤاتیێ یا ده‌ستهه‌لاتا وى ده‌مى یا ئیراقێ بوو.
سه‌رۆك مه‌سعوود بارزانى دبیژیت: رژێما پێشتر یا ئیراقێ د كریاره‌كا نه ره‌وا و بێوژدان دا هه‌شت هزار زه‌لام، پیر و گه‌نجێن بارزانى هه‌ر ژ ژیێ نه‌هـ تا نۆت سالیێ چونكى بارزانى و كورد بوون ده‌سته‌سه‌ركرن و ب شێوه‌یه‌كێ نه‌مرۆڤانه ل بیابانێن باشۆرێ ئیراقێ كۆمكوژكرن، ئه‌و تاوان پشكه‌ك بوون ژ ده‌ستپێكا وان زنجیرێن تاوانێن ب شێوه‌یێن رێكخستى بۆ ژناڤبرنا گه‌لێ كوردستانێ ژ ئالیێ رژێما پێشتر یا ئیراقێ ڤه هاتنه كرن، هه‌ر ژ بیسه‌رشوونكرنا دوازده هزار گه‌نجێن فه‌یلى، ئه‌نفال و كیمیاباران ل سه‌رانسه‌رى كوردستانێ و ته‌عریبكرن و گوهۆڕینا دیمۆگرافییا كوردستانێ.
هه‌روه‌سا دیاركر، د چل و ئێكه‌مین سالیادا ئه‌نفالكرنا بارزانییان دا سلاڤ بۆ گیانێ پاقژێ شه‌هیدێن ئه‌نفال و هه‌موو شه‌هیدێن كوردستانێ د هنێریم، هه‌روه‌سا سوپاسییا خه‌لكێ كوردستانێ ب تایبه‌ت جه‌ماوه‌رێ ده‌شتا هه‌ولێر، حه‌ریر و سۆران دكه‌م كو د وان رۆژێن ته‌حل دا هه‌ڤسۆزێن بارزانییان بوون و هاریكارییا ون كر، سوپاسییا كه‌سوكارێن ئه‌نفالكرییان ب تایبه‌ت ئه ودایك و ژنێن بارزانى دكه‌م كو نموونه‌یا خۆڕاگرى و قاره‌مانیێ بوون و ئازارا چاڤه‌ڕێبوون و دوورییا عه‌زیزێن خۆ دیتینه.
سه‌رۆك بارزانى ل دوماهییا په‌یاما خۆ ئاشكراكر، ئه‌ڤ تاوانا ل دژى خه‌لكێ كوردستانێ هاتییه‌كرن، هه‌ر هه‌موو ده‌رئه‌نجامێ عه‌قلییه‌تا شۆفێنى و خۆسه‌پێن نه‌مرۆڤایه‌تى یا ده‌ستهه‌لاتا سه‌رده‌مێ پێشتر یا ئیراقێ بوو و ئه‌و عه‌قلییه‌ته ئه‌گه‌رێ سه‌ره‌كى یێ پاشكه‌فتن و نه‌هامه‌تى و كاره‌ساتان بوو بۆ هه‌موو گه‌لێن ئیراق و ناوچێ.