کچەکا کورد بۆ ئێکەم جار د دیرۆکێ دا دێ خەتیرا ئۆلۆمپیاتان ل پاریسێ هەلگریت،
شیلان مستەفا، کچەکا کوردا ئیراقێ یە، نوکە ل باژێڕکەکێ نێزیکی پاریسێ دژیت، ئەو ب فەرمی هاتییە ئاگەهدارکرن کو ل 26ی ڤێ مەهێ ل دەما خەتیرا ئۆلۆمپیاتێن ئەڤ سالە یێن پاریسێ ژ ئەسینا بەر ب پاریسێ دهێتە برن، ل قووناغێن دویماهییێ ئەو دێ خەتیرێ هەلگریت.
شیلان مستەفا کی یە؟
شیلان مستەفا کچەکا کورد یا 33 سالی یە، شیلان ل سالا 1991ێ ل باژێڕێ دیالا ل کوردستانا ئیراقێ ژدایک بوویە، پاشی ل گەل مالباتا خۆ ل چەندین باژێڕێن ئیراقێ ژیایە، پاشی چووینە لیبیا و ل دەما ژییێ شیلانێ 14 سال، مالباتا وێ چوویە فرەنسا.
شیلانێ ل فرەنسا خواندنا ئەندازیارییا دیزاینا پیشەسازی خواندییە، لێ حەزا وێ یا زێدەتر ل سەر وەرزشێ بوو و چەندین جۆرێن وەرزشێ مینا ب سەرکەفتنا چیایان، غاردان، تەپادەستی، و تایکواندۆ کرینە، لێ حەزا وێ یا مەزن ل سەر تایکواندۆیێ بوو.
شیلان پشتی چەندین سالان بوویە راهێنەرا تایکواندۆیێ، پاشی ل باژێڕکێ خۆ یانەیەک بۆ فێرکرنا تایکواندۆیێ ڤەکرییە، نوکە پتر ژ 40 قوتابییان هەنە.
چاوا شیلان هاتە ژێگرتن خەتیرا ئۆلۆمپیاتان هەلبگریت؟
شیلان شیا ل باژێڕکێ خۆ باژێڕکێ فلۆری، ببیتە نمۆنەیەک بۆ کۆچبەران و ژبەر گرنگیدانا وێ ب زارۆکان و فێرکرنا زارۆکان، بوویە جهێ سەرنجا رێکخەرێن ئۆلۆمپیاتێن پاریسێ، لەورا وان نامەیەک بۆ وێ هنارتییە و داخواز ژێ کرییە: فۆرمەکێ پڕ بکەت، پشتی پڕکرنا فۆرمێ ب چەندین رۆژان، نامەیەک بۆ شیلانێ چوویە و داخواز ژێ هاتییە کرن، ل رۆژا 22ی ڤێ مەهێ ل جهەکێ دەستنیشانکری یێ پاریسێ ئامادە ببیت داکو ل ئێک ژ قووناغێن دویماهییێ خەتیرا ئۆلۆمپیاتان هەلبگریت.