نێچیرڤان بارزانى، سه‌رۆكێ هه‌رێما كوردستانێ سه‌ره‌خۆشى ل ئه‌كره‌م سالح، به‌رپرسێ لقێ 22 یێ پارتى كر كو دوهى ژ بزاڤه‌كا تیرۆرستى رزگارببوو و راگه‌هاند، بزاڤێن تیرۆستى و بزاڤێن تیرۆرا سیاسى شه‌رمزار دكه‌م.
ئه‌ڤرۆ سێشه‌مبێ 16-7-2024ێ نێچیرڤان بارزانى، سه‌رۆكێ هه‌رێما كوردستانێ د پوه‌ندییه‌كا ته‌له‌فوونى دا پرسا ئه‌كره‌م سالح، به‌رپرسێ لقێ 22 یێ پارتى كر و كو دوهى ل هه‌مبه‌رى مالا خۆ ل كه‌لار ژ بزاڤه‌كا تیرۆرستى كو په‌قاندنا ترومبیلا وى بوو رزگارببوو.
سه‌رۆك نیچیرڤان بارزانى زێده‌بارى پرسكرنا حالێ وى هیڤییا سلامه‌تیی بۆ وى و برینداران خواست و هیرش شه‌رمزار كر و ئه‌و بزاڤا تیرۆرستى و هه‌موو بزاڤێن تیرۆرا سیاسى ژى شه‌رمزار كرن و دوپاتكر، ئالیێن په‌یوه‌ندیدار دویڤچوونێ بۆ كه‌یسێ دكه‌ن دا ئه‌نجامده‌رێن وێ ببینن و رووبرووى یاسایێ بكه‌ن.
ژ ئالیێ خۆ ڤه ئه‌كره‌م سالح زێده‌بارى ئاماژه ب چاوانییا بزاڤا تیرۆركرنا وى و دیاركرنا زیانان، سوپاسی و پێزانین بۆ خه‌مخۆرى و لێپرسین و دیفچوونا سه‌رۆكێ هه‌رێما كوردستانێ هه‌بوون.