کۆمسیۆنا هەلبژارتنێن ئیراقێ ئەڤرۆ ب فەرمی دەرگەهێ خۆ تۆمارکرنێ بۆ هەلبژارتنێن پەرلەمانێ کوردستانێ داخست و هەموو پارتی و هەڤپەیمانی و بەربژارێن سەربەخۆ یێن دێ پشکداری هەلبژارتنان بن، ل کۆمسیۆنێ هاتنە تۆمارکرن.
ئەڤرۆ رۆژا پێنجشەمبی 18-7-2024ێ ل گەل ب دویماهیهاتنا دەما دەواما فەرمی، کۆمسیۆنا هەلبژارتنان دەمێ تۆمارکرنا لیست، پارتی، هەڤپەیمانی و بەربژارێن سەربەخۆ داخست و جۆمانە گلای، پەیڤدارا کۆمسیۆنێ دیارکر : دەما تۆمارکرنێ ناهێتە درێژکرن ڤە.
ئەڤرۆ پارتی دیمۆکراتی کوردستان کو مەزنترین پارتییا سیاسی یا هەرێما کوردستانێ یە، ناڤێن 190 بەربژاران رادەستی کۆمسیۆنێ کرن کو 48 ژ وان ل پارێزگەها دهۆکێ و ئیدارەیا سەربەخۆ یا زاخۆ نە.
ئێکەتییا نشتیمانی یا کوردستانێ ژی ناڤێن 173 بەربژاران رادەستی کۆمسیۆنێ کرینە و پارت و ئالییێن دی ژی یێن سیاسی و بەربژارێن سەربەخۆ ژی ناڤێن خۆ ل کۆمسیۆنێ تۆمارکرینە.