د بەردەوامییا کۆمبوونێن سەرۆک بارزانی ل بەغدایێ، ئەڤرۆ ل گەل بالیۆز و نوینەرێن هەشت وەلاتێن عەرەبی کۆمبوو و پشتی کۆمبوونێ راگەهاند: سەقایەکێ ئەرێنی ل ئیراقێ هەیە.
سەرۆک مەسعوود بارزانی ئەڤرۆ ل بەغدایێ پێشوازی ل شاندەکا بالیۆز و نوینەرێن وەلاتێن عەرەبی کر کو پێکدهات ژ بالیۆزێن کوێت، قەتەر، مسر، بەحرەین، و عومانێ و نوینەرێن وەلاتێن ئوردن، سعوودیە، و ئیماراتێ.
بارەگایێ بارزانی دەربارەی کۆمبوونێ راگەهاند: سەرۆک مەسعوود بارزانی د کۆمبوونێ دا گۆتییە نوینەرێن وەلاتێن عەرەبی کو نوکە سەقایەکێ ئەرێنی و گونجای بۆ چارەکرنا کێشەیان ل بەغدایێ هەیە، لەورا وی ئەڤ سەرەدانە کرییە و ئارمانج ژ سەرەدانێ نەهێلانا گرێک و ئالۆزییانە داکو ئیراق سەقامگیر ببیت و دێ سەقامگیرییا ئیراقێ کارتێکرنەکا ئەرێنی ل سەر سەقامگیرییا دەڤەرێ هەبیت.