ئەڤرۆ دویماهی کاروانێ حەجییێن هەرێما کوردستانێ بەر ب ئەرەبستانا سعوودییێ ب رێ دکەڤیت و ل گۆرەی وەزارەتا حەج و عومرێ یا هەرێما کوردستانێ، رەوشا ساخلەمییا حەجییێن گەهشتینە سعوودییێ ژی یا باشە.
کاروان ستوونی، پەیڤدارێ وەزارەتا حەج و عومرێ یا هەرێما کوردستانێ راگەهاند: ئەڤرۆ ل دەمژمێر 9:00 سپێدێ دویماهی کاروانێ ئەڤ سالە یێ حەجییێن هەرێما کوردستانێ کو ژ 345 کەسان پێکدهێت، دێ ژ فرۆکخانەیێن هەولێر و سلێمانییێ بەر ب ئەرەبستانا سعوودییێ ب رێ کەڤیت.
ستوونی هەروەسا دبێژیت: پێشتر 4 هزار و 340 حەجییێن هەرێما کوردستانێ گەهشتینە ئەرەبستانا سعوودییێ، ل گەل وان، 21 نوشدار و کارمەندێن ساخلەمییێ هەنە، بەردەوام چاڤدێرییا ساخلەمییان وان دکەن و رەوشا ساخلەمییا هەمی حەجییێن هەرێما کوردستانێ یا باشە.