هه‌ڤپه‌یمانییا ته‌قه‌دوم ب فه‌رمى پشته‌ڤانییا خۆ بۆ به‌ربژاركرنا مه‌حموود مه‌شهه‌دانى بۆ پۆستێ سه‌رۆكێ جڤاتا نوینه‌رێن ئیراقێ راگه‌هاند.
ئۆفیسا راگه‌هاندنێ یا ته‌قه‌دوم د به‌یانه‌كێ دا راگه‌هاند "ل گۆره‌ى باوه‌رییا مه ب گرنگییا رۆلێ چاڤدێرییێ و یاسادانانێ یێ په‌رله‌مانێ ئیراقێ و گرنگییا كاراكرنا ڤى رۆلى د چارچووڤه‌یێ سیسته‌مێ هه‌ڤسه‌نگییا سیاسى دا و پشته‌ڤانیكرن ل رێره‌وێ دیمۆكراسى و پشتى رێككه‌فتنێ ل گه‌ل فراكسیۆنا سه‌داره د په‌رله‌مانى دا، ئه‌م پشته‌ڤانییا خۆ بۆ به‌ربژاركرنا مه‌حموود مه‌شهه‌دانى بۆ پۆستێ سه‌رۆكێ په‌رله‌مانى رادگه‌هینین".
ته‌قه‌دوم د به‌یانه‌كێ دا "داخواز ژ فراكسیۆنێن سیاسى كر پشته‌ڤانییێ ل ڤێ به‌ربژاركرنێ ژ بۆ ئێكلاكرنا ڤێ ئیستیحقاقێ، كاراكرنا رۆلێ جڤاتا نوینه‌ران و ته‌مامكرنا رێككه‌فتنا سیاسى ئه‌وا جڤاتا نوینه‌ران د چارچووڤه‌یێ به‌رنامه‌یێ حكومى دا ده‌نگ ل سه‌ر داى، بكه‌ن".
به‌رى نوكه هه‌ڤپه‌یمانیێن عه‌زم، سه‌روه‌رى و حه‌سم یا نیشتیمانى پشته‌ڤانییا خۆ بۆ سالم عیساوى بۆ پۆستێ سه‌رۆكێ په‌رله‌مانى ده‌ربڕیبوون.
ل ناڤه‌راستا هه‌یڤا چرییا دوێ یا سالا بۆرى، په‌رله‌مانێ ئیراقێ ب پشتبه‌ستن ب بڕیاره‌كا دادگه‌ها فیدرالى ئه‌ندامه‌تییا محه‌مه‌د حه‌لبووسى د په‌رله‌مانى دا ب دویماهیك ئینابوو و تا نوكه سه‌رۆكه‌كێ نوى بۆ په‌رله‌مانى نه‌هاتیه هه‌لبژارتن.