وه‌زاره‌تا خواندنا بلند و لێكۆلینێن زانستى یا هه‌رێما كوردستانێ راگه‌هاند؛ رێكارێن دامه‌زراندنا سێ ئێكه‌مێن پشکێن زانكۆیان ژ ده‌رچوویێن سالا خواندنێ 2017-2018 هه‌تا 2022-2023 ده‌ستپێكرن.
ئه‌ڤرۆ ئێكشه‌مبییێ ل دیوانا وه‌زاره‌تا خواندنا بلند و لێكۆلینێن زانستى كۆمبوونه‌ك ل دۆر بابه‌تێ دامه‌زراندنا سێ ئێكه‌مان ل پشکێن جودا جودا یێن زانكۆیان برێڤه‌چوو.
د. هێمن ئەمین ل وه‌زاره‌تا خواندنا بلند راگه‌هاند "سه‌رۆكایه‌تییا جڤاتا وه‌زیرێن هه‌رێما كوردستانێ نڤیساره‌ك ب ژماره 1928 ل رۆژا 25/4/2024 بۆ مه ئاراسته كربوو دا كو داتا و زانیاریێن ته‌مام ل دۆر سێ ئێكه‌مێن زانكۆیان ئاماده بكه‌ین و پاشى ره‌وانه‌ى به‌غدا بكه‌ین ژ بۆ دامه‌زراندنا وان".
دیار ژى كر؛ ل سه‌ر هه‌مى زانكۆیان پێدڤییه د ده‌مێ پێنج رۆژێن كاركرنێ دا هه‌مى زانیارییان وه‌كى د خشته‌ى دا هاتی ل دۆر ئێكه‌مێن پشکێن زانستى ژ ده‌رچوویێن سالێن خواندنێ 2017-2018 هه‌تا 2022-2023 ب لیستێن جودا بۆ وه‌زاره‌تێ بلند بكه‌ن.
رێڤه‌به‌رێ گشتى یێ فه‌رمانگه‌ها كارگێرى و دارایى گۆت "دامه‌زراندنا سێ ئێكه‌مێن زانكۆیێ ب ئه‌ركێ ده‌ستپێكى یێ خۆ دزانین".
ئاماژه ب وێ چه‌ندێ ژى كر "د سالێن بۆرى دا ب بزاڤێن وه‌زیرێ خواندنا بلند و لێكۆلینێن زانستى سێ ئێكه‌مێن زانكۆیان یێن سالێن 2015-2016 و 2016-2017 هاتبوونه دامه‌زراندن كو ژماره‌یا وان 2842 قۆتابى بوون".