سه‌رۆكایه‌تییا هه‌رێما كوردستانێ ناڤه‌ڕۆكا كۆمبوونا سه‌رۆك نیچیرڤان بارزانى، ل گه‌ل سه‌رۆكێ ئیمارتێ به‌لاڤكر و دیاركر، چه‌ندین مژارێن گرنگ هاتینه به‌حسكرن.
ئێڤاریا رۆژا ئه‌ینیێ 24-5-2024ێ نێچیرڤان بارزانى، سه‌رۆكێ هه‌رێما كوردستانێ ل ئه‌بو زه‌بى ل گه‌ل شێخ محه‌مه‌د بن زاید ئالنه‌هیان، سه‌رۆكێ ئیمارتێ كۆمبوو.
د كۆمبوونه‌كا دۆستانه‌دا په‌یوه‌ندیێن ئیمارات ل گه‌ل ئیراق و هه‌رێما كوردستانێ، ره‌وشا ئیراق و هه‌رێما كوردستانێ، په‌یوه‌ندیێن هه‌ولێر و به‌غدایێ به‌حسكرن، هه‌ر دو ئالییان دوماهى پێشهاتێن ناوچێ ژى خستنه به‌ر دانوستاندنان.
سه‌رۆكێ هه‌رێمێ و سه‌رۆكێ ئیماراتێ گرنگى ب به‌رده‌ومیدان ب په‌یوه‌ندیێن ئابۆرى و بازرگانى و هاریكارییا تێهێ كر، هه‌روه‌سا به‌حس ل ده‌لیڤه و بوارێن وه‌به‌رهێنان و سه‌رمایه‌گۆزارییا ئیماراتى ل ئیراق و هه‌رێما كوردستانێ كر، ب تایبه‌ت د پڕۆژه‌یێن ژێرخان و گه‌شه‌پێدانێ دا.
ده‌رباره‌یى ره‌وشا رۆژهه‌لاتا ناڤین و لێكتێكگه‌هشتنان، هه‌ر دو ئالى هه‌ڤڕابوون ل سه‌ر گرنگییا كارێ پێكڤه و هاریكارییا هه‌ڤپشك و هه‌مه‌لایه‌ن یا وه‌لاتان بۆ پاراستنا ئارامى، سه‌قامگێرى و رێگریكرن ل به‌رفره‌هبوون و گه‌شه‌كرنا زێده‌تر یا ئالۆزییان.
په‌یوه‌ندیێن هه‌ولێر و به‌غدایێ ل گه‌ل وه‌لاتێن جیران و ناوچێ، گوهۆڕینێن سه‌قایى، ده‌رئه‌نجامێ وان، هه‌روه‌سا چه‌ندین مژارێن دى یێن جهێ گرنگیپێدانا هه‌ر دو سه‌رۆكان ئالیه‌كێ دى یێ كۆمبوونێ بوو