سه‌رۆكێ حكومه‌تا هه‌رێما كوردستانێ په‌یامه‌ك ب هه‌لكه‌فتا دامه‌زراندنا ئێكه‌تییا مامۆستایێن كوردستانێ به‌لاڤكر و هیڤی خواست ل سه‌ر په‌روه‌رده‌كرنه‌كا راست و داهێنه‌رانه به‌رده‌وام بن و داكۆكیێ ل ده‌ستكه‌فتێن نشتیمانى و قه‌واره‌یێ ده‌ستوورى یێ هه‌رێما كوردستانێ بكه‌ن.
مه‌سروور بارزانى، سه‌رۆكێ حكومه‌تا هه‌رێما كوردستانێ ئه‌ڤرۆ چارشه‌مبێ 15-5-2024ێ په‌یامه‌ك ب هه‌لكه‌فتا دامه‌زراندا ئێكه‌تییا مامۆستایێن كوردستانێ به‌لاڤكر و پیرۆزباهى ل سه‌رۆك و ئه‌ندامێن سكرتارییه‌ت و هه‌موو مامۆستایێن كوردستانێ كر و هیڤییا پێشكه‌فتنێ بۆ وان خواست.
هه‌روه‌سا گۆت: ئێكه‌تییا مامۆستایێن كوردستانێ د سه‌رده‌مه‌كى سه‌خت دا هاته دامه‌زراندن و دیرۆكه‌كا پرشه‌نگدار ژ خه‌باتا رێكخراوه‌یى و پیشه‌یى و داكۆكیكرن ژ ماف و داخوازیێن مامۆستایێن كوردستانێ هه‌بوویه و به‌ره‌ڤانى ژ مافێن ره‌وایێن خه‌لكێ كوردستانێ كریه.
هه‌روه‌سا دیاركر، ئه‌و رۆلێ مامۆستایان د په‌روه‌رده و فێركرنا نفشێن مه دا ب گرنگ ته‌ماشه دكه‌ت و هیڤى ژى خواست به‌رده‌وامبن ل سه‌ر ئه‌ركێ خۆ یێ پیرۆز بۆ گه‌شه‌پێدانا هزرا نشتیمانپه‌روه‌ى و پێگه‌هاندنا قوتابیان و نفشێن بهێت ل سه‌ر په‌روه‌رده‌یه‌كا راست و داهێنه‌رانه و ڤیانا كوردستانێ و داكۆكیكرن ژ ده‌ستكه‌فتێن نشتیمانى و قه‌واره‌یێ هه‌رێما كوردستانێ.