سه‌رۆكێ هه‌رێما كوردستانێ په‌یامه‌ك د یادا سیهـ و شه‌ش سالییا ههوا ئه‌نفالان دا به‌لاڤكر و راگه‌هاند، دڤێت حكومه‌تا ئیراقێ ئه‌ركێ خۆ هه‌مبه‌رى قوربانیێن ئه‌نفالان بجهـ بینیت.
نێچیرڤان بارزانى، سه‌رۆكێ هه‌رێما كوردستانێ په‌یامه‌ك د یادا ئه‌نفالان دا به‌لاڤكر و راگه‌هاند، ئه‌ڤرۆ یادا خه‌مگین یا سیهـ و شه‌ش سالییا ههوا ئه‌نفالان ل بیر دئینین كو تێدا 182 هزار زاڕۆك، ژن، زه‌لام و گه‌نجێن كوردستانێ هاتبوونه ئه‌نفالكرن، ئێك ژ مه‌زنترین تاوان و جینۆسایدانه د دیرۆكێ دا ل سالا 1988ێ ل سه‌ر ده‌ستێ رژێما وى ده‌مى یا به‌غدایێ هاتیه‌كرن.
سه‌رۆك نێچیرڤان بارزانى دیاردكه‌ت، ده‌رئه‌نجامێن وێ تا نوكه و پاشه‌رۆژی ژى دێ به‌رده‌وام بن و دڤێ یادێ دا سه‌رێ رێز و نه‌وازشێ بۆ قوربانیێن ئه‌نفالان د چه‌مینین.
هه‌روه‌سا نێچیرڤان بارزانى دبێژیت: ل ده‌مه‌كى دادگه‌ها بلند یا تاوانان ل ئیراقێ ئه‌ڤ تاوانه ب جینۆساید ناسادیه، داخوازییا مه ژ حكومه‌تا فیدرال ئه‌وه بۆ بجهـ گه‌هاندنا دادوه‌ریێ، ئه‌ركێ خۆ بجهـ بینیت و قوربانییان ژ هه‌موو روویه‌كى ڤه قه‌ره‌بوو بكه‌ت، هه‌روه‌سا دوپاتى ل خزمه‌تكرنه‌كا باشتر بۆ كه‌سوكارێن سه‌ربلندێن ئه‌نفالان د هه‌موو واره‌كى دا كر و هه‌ر چ یا د شیان دا بیت بۆ وان درێغى نه‌هێته‌كرن.
هه‌ر د درێژاهییا په‌یاما خۆ دا نێچیرڤان بارزانى گۆت: كه‌سوكارێن هێژا یێن ئه‌نفالكرییان پشت راست دكه‌ن تا دوماهاییا پرۆسه‌یا لێگه‌ڕیانێ ل رووفاتێن شه‌هیدان و ڤه‌گه‌ڕاندنا وان بۆ باوه‌شا وه‌لاتى دێ به‌رده‌وام بن و دوپاتى ل كار و بزاڤێن هه‌موو ئالیان كر بۆ وێ یه‌كێ تاوانا ئه‌نفالان ل سه‌ر ئاستێ نێڤده‌وله‌تى ژى ب جینۆساید بهێته ناسكرن و تاوانێن بڤى ره‌نگى ل چ جهێن جیهانێ دروست نه‌بن.
هه‌ر د ڤێ یادێ دا دوپاتى ل پێكڤه‌ییا ته‌ماما ئالییان و پێكهاتێن كوردسانێ كر كو مه‌رجێ پاراستن و مانا ماف و ده‌ستكه‌فتان و فیدرالى و قه‌واره‌یێ هه‌رێما كردستانێ یه، سلاڤ ژى بۆ گیانێ پاقژێ شه‌هیدان ژى هه‌بوون.