سه‌رۆكێ دادگه‌ها بلندا فیدرال ل ئیراقێ راگه‌هاند، ب بانكیكرنا مووچه‌یێن فه‌رمانبه‌رێن هه‌رێما كوردستانێ و ڤه‌گوهاستنا وان بۆ سه‌ر ب به‌غدایێ ڤه دێ ب رێكا بانكێن حكومى یێن فیدرال بیت.
جاسم عه‌مێرى، سه‌رۆكێ دادگه‌ها بلندا فیدرال ل ئیراقێ گۆت: ل گۆڕه‌یى بڕیارا دادگه‌هێ سه‌رۆك وه‌زیرێن ئیراقێ و سه‌رۆكێ حكومه‌تا هه‌رێما كوردستانێ هاتینه پابه‌ندكرن ب بجهئینانا بڕیارێ بۆ ب بانكیكرنا مووچه‌یێن فه‌رمانبه‌رێن هه‌رێما كوردستانێ و ڤه‌گوهاستنا وێ بۆ سه‌ر ب به‌غدایێ ڤه ب رێكا بانكێن فیدرال، كو فه‌رمانبه‌ر، خانه‌نشین و مفادارێن تۆڕا پاراستنا جڤاكى ب خۆ ڤه دگریت.
هه‌روه‌سا ئاشكراكریه، وه‌زاره‌تا دارایى یا هه‌رێما كوردستانێ ئالیێ په‌یوه‌ندیداره بۆ دروستكرنا هه‌ماهه‌نگیێ بۆ ڤێ پێنگاڤێ ل گه‌ل وه‌زاره‌تا دارایى یا ئیراقێ، به‌لێ ئه‌گه‌ر رێگرى كر، فه‌رمانگه‌هـ دشێن راسته‌وخۆ هه‌ماهه‌نگیێ ل گه‌ل به‌غدایێ بكه‌ن.
سه‌رۆكێ دادگه‌ها بلندا فیدرال ل ئیراقێ بۆ میدیایا فه‌رمى یا ئیراقێ دیاردكه‌ت، هاتییه سه‌لماندن مووچه‌خۆرێن هه‌رێمێ مه‌هانه ب شێوه‌یه‌كى رێكخستى و د ده‌مێ خۆ دا مووچه‌یێن خۆ وه‌رنه‌گرتینه و نابیت كێشه‌یێن ناڤبه‌را هه‌رێما كوردستانێ و حكومه‌تا فیدرالى ب ئه‌گه‌را نه‌بجهئینانا بوده‌یى ببنه ئه‌گه‌رێ بێبه‌هركرنا وه‌لاتیێن هه‌رێما كوردستانێ ژ مووچه‌یێ مه‌هانه.
28ى مه‌ها بۆرى دادگه‌ها بلند یا فیدرالى ل ئیراقێ ده‌قێ نڤێساره‌كا خۆ به‌لاڤكر كو ل 21ى هه‌مان مه‌هـ ده‌ركربوو، تێدا هه‌ر دو حكومه‌تێن ئیراق و هه‌رێما كوردستانێ پابه‌ندكربوون ب دانا مووچه‌یان، بۆ ڤێ مه‌هی ب لیستا مووچه‌یان و بۆ مه‌هێن بهێت ژى ب رێكا بانكان.
هه‌روه‌سا ئاشكراكر، نابیت فه‌رمانبه‌ره‌كێ ناڤه‌ڕاست و باشۆرێ ئیراقێ مووچه‌یێ خۆ ل ده‌مێ خۆ وه‌رگریت و یێن هه‌رێما كوردستانێ بهێنه بێبه‌هركرن و بڤێ یه‌كێ یه‌كسانى ناهێته بجهئینان و دێ بیته بنپێكارى هه‌مبه‌رى ده‌ستوورى.