د بیرەوەرییا كیمیابارانكرنا هەلەبچە دا نێچیرڤانی بارزانی، سەرۆكێ هەرێما كوردستانێ پەیامەك بەلاڤكر و تێدا ڕاگەهاند، " ئەگەر دادپەروەری هەبایە، جینۆسایدا هەلەبچە بتنێ بەس بو كو هەمی مافێن ڕەوا یێن گەلێ كوردستانێ، بهێنە نیاسین. "
دەقێ پەیاما سەرۆكێ هەرێمێ:
د (36) ه‌مين سالڤەگەرا كارەسات و تاوانا كیمیابارانكرنا هەلەبچە دا، سەرێ ڕێز و نەوازەشێ بۆ گیانێ پاك یێ زێدەتر ژ پێنج هزار شەهیدێن هەلەبچە و هەمی شەهیدێن كوردستانێ دچەمینین، ب ڕێزڤە یادا وان دكەین، سلاڤان بۆ خێزان و كەسوكارێن وان و بۆ هەمی وان قۆربانییان دهنێرین یێن كو هێشتا ب شوینوار و پاشماوێن نەخۆشییێن وێ تاوانێ دنالن.
كيميابارانكرنا هەلەبچە خەلەكەكە ژ زنجیرا تاوان و جینۆساید و ئەنفال و زیندەچالكرنێ كو زۆر دڕندانە دەرهەق ب گەلێ ستەملێكری و ئاشتیخواز و ژیاندۆست و مرۆڤپەروەرێ كوردستانێ هاتییەكرن، گونەها وان ژی بتنێ ئەو بۆ كو د وەلاتێ خۆ دا داخوازا ماف و ژیان و ئازادی و شكومەندییێ كریە. ئەگەر دادپەروەری هەبایە، جینۆسایدا هەلەبچە بتنێ بەس بو كو هەمی مافێن ڕەوا یێن گەلێ كوردستانێ بهێنە نیاسین.
د ڤێ بیرەوەرییێ دا، دۆپاتدكەین كو دڤێت هەلەبچە و خەلكێ وێ و هەمی قۆربانییێن جینۆساید و ئەنفال و تاوانێن ڕژێمێن پێشتر ل هەرێما كوردستانێ ژ هەمی ڕوویەكی ڤە بهێنە قەرەبووكرن، د هەمی بواران ژی دا باشترین خزمەت بۆ بهێتەكرن. بۆ ڤێ یەكێ ژی پێدڤییە حكومەتا عیراقێ هەمی ئەرك و بەرپرسیارەتی و دادپەروەرییێ بۆ قۆربانییان جێبەجێبكەت. ل سەر ئاستێ جیهانێ ژی پێدڤییە كار بهێتەكرن ژبۆ وێ یەكێ چ جاران ڕێك نەهێتەدان تاوان و كومەلكوژییێن هوسا ل چ جهان دوبارە ببن.
دەستكەفت و قه‌واره‌یێ سياسى و ده‌ستوورییێ فيدرالى یێ هه‌رێما كوردستانێ، به‌رهه‌مێ خوینا شه‌هيدان و قۆربانيدانا گه‌لێ كوردستانێ نە ب هه‌می پێكهاتەیێن وێ ڤە، لەوما نوكە ژی ئەركێ هەمییانە ب ئێكڕێزی و تەبایی بپارێزن و گیانێ شەهیدان و دلێ خێزان و كەسوكارێن وان شاد بكەن، داكو پێكڤە بەرەڤ پاشەڕۆژەكا باشتر و ئارام و پاراستی پێنگاڤان بهاڤێژین.
نێچيرڤان بارزانى
سه‌رۆكێ هه‌رێما كوردستانێ
2024/3/16