سه‌رۆكێ حكومهتا هه‌رێما كوردستانێ په‌یامه‌ك د یادا یازده‌یى ئادارێ دا به‌لاڤكر و راگه‌هاند، حكومهتا وى ده‌مى یا ئیراقێ په‌نا بۆ شه‌ڕى بر و ل دژى وه‌لاتیێن هه‌رێما كوردستانێ راوه‌ستیان.
سه‌رۆكێ حكومهتا هه‌رێما كوردستانێ، مه‌سروور بارزانى دبێژیت: ئه‌ڤرۆ پێنجى و چار سال ب سه‌ر راگه‌هاندنا رێككه‌فتننامه‌یا یازده‌یى ئادارێ دا ده‌ربازبوون، كو ده‌ستكه‌فته‌كێ دیرۆكى یێ شۆڕشا مه‌زن یا ئیلۆنێ بوو ب رێبه‌رییا بارزانیێ نه‌مر.
شۆڕش و خۆراگرى و قوربانیدانا گه‌لێ كوردستانێ، حكومهتا وى ده‌مى یا ئیراقێ نه‌چار كر دانپێدانێ ب هنده‌ك ژ مافێن ره‌وا یێن گه‌لێ كوردستانێ بكه‌ن، ب تایبه‌ت رێككه‌فتن ل سه‌ر راستڤه‌كرنا ده‌ستوورێ ده‌مكى و دانپێدان ب هندێ كر كو ئیراقێ ژ دو نه‌ته‌وه‌یێن سه‌ره‌كى (ئه‌ره‌ب و كوردان) پێكهاتیيه و ده‌ستوورى ژى دانپێدان ب مافێن نه‌ته‌وه‌یا گه‌لێ كورد كر.
سه‌رۆكێ حكومه‌تێ دیاردكه‌ت، رژێما وى ده‌مى یا ئیراقێ ژ رێككه‌فتنێ لێڤه‌بوو و په‌نا بره شه‌ڕ و دژاتیكرنا خه‌لكێ هه‌رێما كوردستانێ و سه‌رئه‌نجامێ وێ ژى بوو ئه‌گه‌رێ مالوێرانیێ و كاره‌ساتێن مه‌زن و تا نوكه ژى ئیراق باجا وێ یه‌كێ دده‌ت.
دڤێ یادێ دا مه‌سروور بارزانى دوپاتیێ ل پێدڤى وگرنگییا پاراستن و رێزگرتن ل مافێن ده‌ستوورى یێن گه‌لێ كوردستانێ و قه‌واره‌یێ هه‌رێما كوردستانێ دكه‌ت و دیاردكه‌ت، خه‌لكێ هه‌رێما كوردستانێ چ جاران رێناده‌ت مافێن وان یێن ده‌ستوورى بهێنه بنپێكرن و سته‌م و زۆردارى لێ بهێته كرن و ئیراق ڤه‌گه‌ڕیته سه‌رده‌مێ دكتاتۆرى و تاكڕه‌ویێ.