پەیڤدارێ حكوومەتا هەرێما كوردستانێ ئاشکرا کر، ئەو 618 ملیار دینارێن کۆ حکوومەتا فیدڕاڵی بڕیارا هنارتنێ لسەر دای، سولفەیە و قەر نینە.
گوتژی: "ئەم چاڤەرێی هنارتنا وی پارەی دکەین، پێشینەیا کارێ حکوومەتێ ژی دابەشکرنا مووچەیە."
پێشەوا هەورامانی، پەیڤدارێ فەرمیێ حكوومەتا هەرێما كوردستانێ ڕاگەهاند: "جڤاتا وەزیرێن عێراقێ بڕیار دا 618 ملیار دیناران بۆ مووچەخۆرێن هەرێما کوردستانێ پنێریت، ئەوا کۆ بڕیار لسەر هاتیە دان، قەر نینە و سولفەیه و دەمکیە."
ئاماژە ب وێ ئێکێ ژی کر: "هەتا یاسایا بودجا 2024 دهێتە هەموار کرن، بڕیارە ئەو گوژمێ پارەی بهێتە هنارتن، و ئەڤا کۆ دهێتە هنارتن ژی دێ 300 ملیار کورتهێنان هەبیت بۆ مووچەی."
جڤاتا وەزیرێن عێراقێ، د کۆمبوونا ڕۆژا 14ێ1ێ 2024، چەند بڕیارەک دەرخستن، دناڤ وان دا، لگورەی بودجەیا گشتییا فیدراڵی بۆ ساڵا 2024 و لگور خەرجییا راستەقینە، هنارتنا 618 ملیار دیناران بوو بۆ هەیڤا کانوونا دووێ یا ساڵا 2024 بۆ هەرێما کوردستانێ.
پێشەوا هەورامانی ئاشکرا ژی کر: "د سەرەدانا دوماهیکا شاندا حكوومەتا هەرێما كوردستانێ بۆ بەغدا، شاندا مە بۆ مووچەی د هەموارا بودجەیدا داخازا 875 ملیار دیناران کربوو، ڕێکكەفتن هاتیە کرن کۆ مووچه ژ هەمی پرسێن دی بهێتە جودا کرن، لەورا تنێ ئەو هەموارکرن دێ چارەسەریا ئاریشا مووچەی کەت."
دەربارێ دەمێ دابەشکرنا مووچەی، پەیڤدارێ حکوومەتێ گوت: "ئەم چاڤەرێ دکەین کۆ پارە بهێت، پێشینەیا کارێ حکوومەتێ ژی دابەشکرنا مووچەیە، پارە بهێتە هنارتن ئەم دێ مووچەی دابەش کەین و ئەو کورتهێنانا کۆ هەیەژی، دڤێت وەزارەتا دارایی زەلالکرنێ بدەت، كۆ دێ چاوا شێن دگەل داهاتێ نافخۆ مووچەیێ فەرمانبەران دابین بكەن."