هاتنا شه‌پۆلەکا مەزن یا بەفر و باران و سەرمایێ بۆ هه‌رێما كوردستانێ هاتە راگەهاندن

ئاراس جه‌بار، شەهره‌زایێ سەقاناسیێ راگه‌هاند: سپێدەهیا رۆژا چارشەمبی 10/1/2024 شەپۆلەکا بارانبارینێ دێ بەر ب دەڤەرێن جودا جودا یێن ھەرێما کوردستانێ هێت و ژبەر داکەفتنا بارستێ ھەوایەکێ سار ل جەمسەری بۆ سەر باکوور و رۆژھەلاتا ئەوروپا و کاریگەرییا لاواز لسەر سەقایێ دەڤەرا مە، د دەمێ کاریگەرییا ڤی شەپۆلیدا، پلێن گەرمێ ب رێژەیا 5 هەتا 6 پلە جوداهی دگەل رۆژێن بوری دێ داکەڤیت، شەپۆلەکا دژوار یا بەفربارینێ ژی دێ ل دەڤەرێن سنووری و چیایی هێن، کۆ ب بلنداهیا زێدەتر ژ 1200 مەتران ل ئاستێ روویێ دەریای، ئەگەرێ بارینا بەفر و بارانێ ژی هەیە و ل بلندیا زێدەتر ژ 1500 مەتران ژبەر داکەفتنا پلێن گەرمێ بەفر دێ ب شێوەکێ تمام باریت، ب گشتی دەمێ کاریگەرییا ڤێ شەپۆلێ دهێتە پێشبینیکرن لسەر دەڤەرا مە هەتا رۆژێن 15 و 16ێ ڤێ هەیڤێ بمینیت و ئەگەرێ بارینا بارانەکا باش ل سەرانسەرێ دەڤەرێن ھەرێما كوردستانێ و بارینا بەفرەکا باش ل دەڤەرێن چیایی د دەمێ ڤان چەند رۆژاندا هەیە.
ئاراس جه‌بار، راگه‌هاند ژی: د دەمێ وێ شەپۆلێ ئەگەرێ بەفربارینێ بۆ سەنتەرێ پارێزگەهـ و باژێرێن ھەرێما كوردستانێ لاوازە و پێشبینی ناکەین کۆ بەفر ل ناڤەندێن باژێران و دەڤەرێن نزم بباریت، تنێ ل دەڤەرێن چیای ب بلنداهیا 1200 مەتران لسەر ئاستێ روویێ دەریایێ دێ باریت.