په‌یڤدارێ حكومه‌تا هه‌رێما كوردستانێ په‌یامه‌ك ل دۆر بهانه‌یێن حكومه‌تا فیدرالى ل دۆر نه‌هاتنا مووچه‌یێ فه‌رمانبه‌رێن هه‌رێما كوردستانێ به‌لاڤكر.
پێشه‌وا هه‌ورامى په‌یڤدارێ حكومه‌تا هه‌رێما كوردستانێ ل سه‌ر ئه‌كاونتێ خوه یێ فه‌یسبۆكى دیاركر، هه‌ر ژ ده‌مێ په‌یدابوونا ئاریشه‌یان ل سه‌ر مووچه‌یێ فه‌رمانبه‌رێن هه‌رێما كوردستانێ، هه‌ر ڕۆژه‌كێ بابه‌ته‌كێ نوو دئێخنه به‌ر حكومه‌تا هه‌رێما كوردستانێ و دكه‌نه مه‌رجێ هنارتنا مووچه و مافێن خه‌لكى، د ده‌مه‌كیدا ئه‌وان ب ڕوونى و ئاشكرایى هه‌موو تشت پێشكێشى حكومه‌تا فیدرالى كرینه.
په‌یڤدارێ حكومه‌تێ پرسیار دكه‌ت، ئه‌رێ ئه‌و شه‌فافییه‌ت و ڕوونكرنێن ل ده‌ڤ وان هه‌ین، ل ده‌ڤ حكومه‌تا عیراقێ ژى هه‌نه و دبێژیت: د چار نووچه‌یێن به‌لاڤكرییێن ژماره‌یه‌كا ژێده‌رێن میدیایێن باوه‌رپێكریدا وه‌كو ئه‌لجه‌زیره هاتییه، 20%ێ پاره‌یێ مووچه‌یێ عیراقێ بۆ مووچه‌خۆرێن وه‌همى دچیت، كو نێزیكى 10 ملیار دۆلارێن سالانه‌نه و ژ مووچه‌یێ هه‌موو مووچه‌خۆرێن هه‌رێما كوردستانێ زێده‌تر، هه‌روه‌سا كه‌نالێ ئه‌لحوره دیاردكه‌ت، 300 ملیار دۆلارێن عیراقێ بۆ پرۆژه و مووچه‌یێن وه‌همى چووینه.
ل دووڤ بى بى سى: ل سالا 2014ێ حكومه‌تا عیراقێ بخۆ دانپێدان كر كو 50 هزار سه‌ر‌بازێن وه‌همى مووچه‌ى ژ گه‌نجینه‌یا عیراقێ وه‌ردگرن، وه‌همى نه‌كو بندیوار.
پێشه‌وا هه‌ورامى ڕاگه‌هاند، ئه‌رێ كێ لیسته‌یا وان گرۆپێن میلیشییان هه‌یه یێن هه‌رێما كوردستانێ بۆردوومان دكه‌ن، ئه‌گه‌ر بابه‌ت گه‌نده‌لییه، دڤیابا مووچه‌یێ خه‌لكێ هه‌موو پارێزگه‌هێن عیراقێ هاتبا ڕاگرتن، نه‌كو وه‌كو هنده‌ك سنێله‌یێن سیاسییێن ناڤخۆ دبێژن، ژبه‌ر خاترا ناڤه‌كێ شه‌ریفى، گه‌له‌ك ل كوردستانێ هاته برسیكرن.