سه‌رۆك بارزانى و شانده‌كێ ئه‌مریكى ره‌وشا سیاسى ل هه‌رێمێ و ئیراقێ هه‌روه‌سا ماف و شایسته‌یێن دارایى یێن هه‌رێمێ به‌حسكرن.
سه‌رۆك بارزانى ئه‌ڤرۆ چارشه‌مبیێ ل سه‌لاحه‌دین پێشوازى ل ڤیكتۆریا نولاند جێگرا وه‌زیرێ ده‌رڤه یێ ئه‌مریكا بۆ كاروبارێن سیاسى و شانده‌كێ ل گه‌ل دا كر كو ژ ئه‌لینا رۆمانۆسكى بالیۆزا ئه‌مریكا ل ئیراقێ و مارك سترۆ كۆنسۆلێ گشتى یێ ئه‌مریكا ل هه‌ولێرێ و ژماره‌یه‌كا دپلۆماتكارێن ئه‌مریكى پێكدهات.
باره‌گایێ بارزانى به‌لاڤكریه "د كۆمبوونه‌كێ دا، ره‌وشا سیاسى یا ئیراقێ و ده‌ڤه‌رێ و په‌یوه‌ندیێن دناڤبه‌را حكومه‌تا هه‌رێما كوردستانێ و حكومه‌تا فیدرالى دا و پێدڤیاتیا چاره‌سه‌ركرنا كێشه‌یێن دناڤبه‌را وان دا و بابه‌تێ مافێن ده‌ستوورى و شایسته‌یێن دارایى یێن هه‌رێما كوردستانێ هاتنه به‌حسكرن".
ديار ژى كریه "هه‌ر د كۆمبوونێ دا، به‌حسێ هه‌ره‌شه‌یێن ئه‌منى و مه‌ترسیێن سه‌رهلدانا داعش ل ئیراقێ و ده‌ڤه‌رێ هاته كرن و دوپاتى ل سه‌ر هه‌ماهه‌نگیێ دناڤبه‌را هه‌رێما كوردستانێ و حكومه‌تا ئیراقێ و هه‌ڤپه‌یمانان دا بۆ رویبرویبوونا هه‌ره‌شه‌یێن تیرۆرێ و ئاسته‌نگێن ئه‌منى هاته كرن".
"بارودۆخێ سیاسى یێ ناڤخۆیى ل هه‌رێما كوردستانێ ته‌وه‌ره‌كێ دى یێ دیدارێ بوو و شاندێ مێهڤان سوپاسیا خۆ بۆ پێشڤه‌چوونا ژێرخانه‌یا هه‌رێمێ و ئارامى و سه‌قامگیریا هه‌رێما كوردستانێ هه‌بوو و دوپاتى ژى ل پێدڤیاتیا هه‌ماهه‌نگیێ و ئێكرێزیێ دناڤبه‌را لایه‌نێن سیاسى یێن هه‌رێما كوردستانێ دا هاته كرن"، هه‌ر ل گۆره‌ى به‌یانا باره‌گاى.
د به‌یانێ دا هاتیه ژى "د پشكه‌كا دى یا وێ كۆمبوونێ دا، سه‌رۆك بارزانى ئاماژه ب وێ چه‌ندێ كر كو هه‌رێما كوردستانێ هه‌رده‌م بزاڤكریه ل ئیراقێ فاكته‌رێ سه‌قامگیرى و چاره‌سه‌ریێ بیت و ڤیایه گرفتێن ل گه‌ل حكومه‌تا فیدرالى ب دانوستاندنێ چاره بكه‌ت لێ كۆمه‌كا فاكته‌ران بووینه رێگر د چاره‌سه‌ركرنا كێشه‌یێن دناڤبه‌را حكومه‌تا هه‌رێمێ و حكومه‌تا فیدرالى و ڤه‌گه‌ڕیانا ئاواره‌یان و ئاساییبوونا ره‌وشا ده‌ڤه‌را شنگالێ دا".