سه‌رۆكێ ده‌سته‌یا وه‌به‌رهێنانێ ل هەرێما کوردستانێ گۆت: 200 كۆمپانییێن بریتانی ژ سەرجەمێ 3500 كۆمپانییێن جیهانی ل هه‌رێما كوردستانێ كاردكه‌ن، گۆت ژی: ئارامییا رەوشا سیاسییا هه‌رێما كوردستانێ هۆكارەكه بۆ راكێشانا وه‌به‌رهێنه‌رێن بیانی.
د. محه‌مه‌د شوكری، ل دەمێ پێشكشكرنا گوتارەکێ ل کۆنفرانسێ سالانە یێ جڤاتا بازرگانییا عێراق - بریتانی ل باژێرێ دوبەیی ل ئیماراتێ، لژێر ناڤێ (عێراق، ئاڤاکرنا پاشەرۆژەکا بەردەوام) راگه‌هاند، ئارامییا رەوشا سیاسی و ئه‌منی و هه‌روه‌سە فره‌كلتووری و دیموكراسی، ئالته‌رناتیڤێن كاریگه‌رن بۆ راكێشانا وه‌به‌رهێنه‌ران بۆ هه‌رێما كوردستانێ.
ناڤهاتی گۆت ژی: نوکە نێزیكی 200 كۆمپانییێن بریتانی ل گەل 3500 كۆمپانییێن دیتر یێن جیهانی ل هه‌رێما كوردستانێ كاردكه‌ن، كو د بیاڤێن خواندن، خوارنێ، ڤەگوهاستن، چاڤدێرییا ساخلەمییێ، كه‌رتێ پیشه‌سازی، كه‌رتێ نه‌فت و غازێ دا كاردكه‌ن.
سه‌رۆكێ ده‌سته‌یا وه‌به‌رهێنانێ گۆت ژی: بزاڤێن حكومه‌تا هه‌رێما كوردستانێ ب ئاراسته‌یا ئه‌نجامدانا پڕۆژێن ژێرخانا ئابووری د بنەرەتینە، دناڤا واندا وزه، ب تایبه‌تی وزه‌یا به‌رده‌وام و نووبوو‌ن، به‌نداڤ، هێلا شه‌مه‌نده‌فه‌رێ، باشتركرنا خزمه‌تگوزارییێن گشتی، رێک و پرێن بلەز و ته‌كنه‌لۆژییا، هەروەسا هه‌رێما كوردستانێ ب سامانێن سرووشتی یا ده‌وله‌مه‌نده (ل ژێر ئەرد و سه‌ر ئەرد) ڤێ چەندێ وەكرییه، کو چه‌ندین كارگه‌هێن پیشه‌سازی یێن مەزن بهێنە دانان.