ئه‌وێن خه‌ونا ب شكه‌ستنا پارتى دبینن
غیاس خالد زێبارى
پشتى راگه‌هاندنا ئه‌نجامێن سه‌ره‌تایى یێن هه‌لبژارتنێن جڤاتێن پارێزگه‌هێن مووسل و كه‌ركووك وه‌ك به‌شه‌ك ژ هه‌لبژارتنێن جڤاتێن پارێزگه‌هێن ئیراقێ ئه‌وێن لرۆژا 18/12/2023 هاتینه ئه‌نجادان، ژماره‌كا ئۆرگانێن راگه‌هاندنێ یێن هنده‌ك حزبێن سیاسى و كادر و لایه‌نگرێن وان ل تۆرێن جڤاكى هه‌وه‌كا به‌رفره‌هــ دژى پارتى دیموكراتى كوردستان ده‌سپێكریه و پارتى ب پارتیه‌كا شكه‌ستى لڤان هه‌لبژارتنا دیار دكه‌ن.
به‌رى ب ئێك په‌یڤ به‌رسڤا وان لایه‌ن و دیڤه‌لانكا بده‌ین، دبێژینه وان هوون چ ل دیوكراسیه‌تێ و هه‌لبژارتنا نزانن، ئه‌گه‌ر وه تشته‌ك لێ زانیبا دا زانن كۆ د پرۆسێن هه‌لژارتناندا شگه‌ستن تێدا نیه به‌لكى سه‌ركه‌فتن و دووڕاندنه، ئه‌وێ پڕانى و زۆرینه بده‌ست دئینیت لایه‌نێ سه‌ركه‌فتى یه و ئه‌وێ كێمانیێ بده‌ست دئینیت لایه‌نێ دووڕاندى یه, سه‌ركه‌فتن و دووڕاندن مینا یاریا ته‌پا پێ یه دبیت ئه‌وێ ئه‌ڤرۆ بسه‌ركه‌فتى ل یاریا داهاتى بدووڕینیت و به‌رۆڤاژى، لێ ئه‌وێ ئه‌ڤ دشكێتن ده‌مه‌كێ درێژ دڤێت هه‌تا سه‌ردكه‌ڤیت .
ره‌نگى ئه‌نجامێن ڤان هه‌لژارتنێن پارێزگه‌هێن مووسل و كه‌ركووك بدلێ پارتى و جه‌ماوه‌رێ وێ نه‌بن لێ پارتى تووژى شكه‌ستنێ نه‌بوویه چونكى ل پارێزگه‌ها مووسل كۆ عه‌ره‌ب زۆرینه ئه‌گه‌ر لیستا ئێكێ نه‌بیت یا دوویێ یه ، ل كه‌ركووك ژى ئه‌گه‌ر ده‌نگێن وێ زێده‌تر نه‌بن ل به‌رێ كێمتر نه‌بوونه، ئه‌رێ چ شكه‌ستن دڤێ چه‌ندێ دایه..؟
ئه‌ڤ هه‌وا راگه‌هاندن و سۆشیال میدیایێ یا دژى پارتى دهێته‌كرن ، به‌رنامه‌كێ رێكخستى و پلان دارشتى یه بۆ لاوازكرنا ووڕه‌یا ئه‌ندام و لایه‌نگرێن پارتى بۆ هه‌لبژارتنێن داهاتى ئه‌و ئه‌و ژبه‌ر دڕه‌ڤن و بلا بزانن پارتى لڤان پرۆپاكندا تێربوویه ئه‌وێن به‌رى زێده‌تر ل نیڤ چه‌خى باب و باپیرێن وه به‌لاڤدكرن و هێشتا نه‌گه‌هشتینه مه‌رامێن خۆ، پارتى ب سه‌رۆك و سه‌ركردایه‌تى و كادر و رێكخستن و جه‌ماوه‌رێ خۆڤه ئه‌و هێزا بۆلاییه ئه‌وا پیلانێن نیڤده‌وله‌تى و له‌شكرێن وه‌لاتێن هه‌رێمى نه‌شیاى بشكێنن و پشتى هه‌ر خیانه‌ته‌كێ ، بخۆڕاگریه‌كا مه‌زنتر سه‌ركه‌فتنێن مه‌زنتر بده‌ست ئیناى .
ئه‌و دژایه‌تیا ڤان سالا نه‌خاسمه لڤان هه‌لبژارتنا لسه‌ر ئاستێ ئیراقێ و ناڤخۆیێ كوردستانێ ل پارتى هاتیه كرن ، ل هه‌ر حزبه‌كا كوردستانى هاتبا كر دا ده‌ستا داهێلیت و وێره‌كا پشكداریكرنێ ژى ل هه‌لبژارتنا نه‌دبوو، لێ سه‌ره‌راى وان هه‌مى كڤاشێن سیاسى و ئابوورى و ئێمناهى پارتى پارتى سه‌ركه‌فتنه‌كا مه‌زن بده‌ست ئینایه چونكى پارتى ده‌مێ شه‌ش سالایه پشتى خیانه‌تكا 16 ێ ئكتۆبه‌را سالا 2017 دوورى ئه‌ندام و جه‌ماوه‌رێ خۆ ل ده‌ڤه‌رێن كوردستانى یێن ده‌رڤه‌ى ئیدارا هه‌رێما كوردستانێ ، چونكى پارتى یا به‌رهه‌ڤ نه‌بوون دانپێدانێ ب كوردستانى نه‌بوونا وان ده‌ڤه‌را بكه‌ت , له‌وما هه‌ر ده‌نگه‌كێ پارتى به‌رامبه‌ر ده‌هان ده‌نگانه، چونكێ ده‌نگێن كوردایه‌تیێ و دلسۆزیێ نه، نه‌ك یێن چاڤسۆركرنێ و رێنمایى یێن دیڤه‌لانكێن فلان وه‌لاتێن هه‌رێمى نه ..!
گرنگه ئه‌وێن خه‌ونا ب شكه‌ستا پارتى دبینن، بلا ژپێخه‌مه‌ت قه‌وارێ هه‌رێمێ و مافێن خه‌لكێ كوردستانێ ژڤێ خه‌ونێ هشیار ببن و وازێ لڤان پیلانا بین چونكى مینا نفشێن خۆ یێن به‌رێ دێ وان خه‌ونا به‌نه د گۆڕێ خۆدا و چ به‌رهه‌م نابن و هێزه دده‌نه پارتى، مینا پارتى بلا بهێنه به‌ره‌یێ كوردایه‌تیێ و نه‌خشێ رێكا رزگارى و ئازادیا كورد و كوردستانێ بجهبینن، چونكى بجهئینانا ڤى نه‌خشتى د ئێكرێزیێ و ئێكگرتنێ دایه ، بلا خه‌ون و پلانێن هه‌مى حزبێن كوردستانى بۆ شكاندنا دوژمن و نه‌یارێن كوردستانێ و سه‌ركه‌فتنا گه‌لێ كورد و شادبوونێ بن ماف و ئارمانجێن سه‌د سالایه قوربانیا بۆ دده‌ین .
ل داویێ تنێ دێ بێژین: چاڤه‌رێبن ئه‌نجامێن هه‌لبژارتنێن په‌رله‌مانێ كوردستانێ دێ بریارا خه‌لكێ كوردستانێ ئاشكرا كه‌ت .
