ئاکرێ نیوز
د روودانه‌كا هاتنوچوونێ دا ل توركیا 11 كه‌سان ژیانا خۆ ژ ده‌ست دا و 57 كه‌س ژى بریندار بوون، ب ئه‌گه‌را روودانێ جادده‌یا ژ مارمارا باكۆر دچیته سته‌نبۆلێ هاته داخستن.
ئه‌ڤرۆ سپێدێ د روودانه‌كا هاتنوچوونێ دا ل سنۆرێ پارێزگه‌ها ساكاریا حه‌فت ترومبێلان لێكدا كو د ناڤا وان دا بارهه‌لگره‌ك و سێ پاسێن نه‌فه‌ران ل هه‌نه، ل سه‌ر جادده‌یا مارمارا باكۆر ل ناوچه‌یا داغیبى ب ئاراسته‌یا سته‌نبۆلێ دچوون.
ل گۆڕه‌یى زانیاریێن یاشار كاراده‌نیز، پارێزگارێ ساكاریا یازده كه‌سان د روودانێ دا ژیانا خۆ ژ ده‌ست دایه و 57 كه‌س ژى بریندار بووینه.
ل گۆڕه‌یى زانیاریێن پارێزگارى به‌لاڤكرین، بریندار بۆ نه‌خۆشخانه‌یان هاتینه ره‌وانه‌كرن و ره‌وشا هنده‌ك ژ برینداران سه‌خته.