ئه‌ڤڕۆ نێچيرڤان بارزانى، سه‌رۆكێ هه‌رێما كوردستانێ پێشوازى ل ڤۆلكه‌ر پێرسێس، سه‌رۆكێ تيما سه‌ربه‌خۆ یا پێداچوونا ستراتيژى ب ئه‌ركێ هنارتییێ نه‌ته‌وێن ئێكگرتی ل عیراقێ ( يوونامى ) كر.
د كۆمبوونێ دا بیروڕا ل دور ئه‌رك و سه‌رەدانا پێرسێس بۆ عیراقێ و ديدار و كۆمبوونێن وی ل گه‌ل به‌رپرسێن بلند یێن عیراقێ هاتنە گوهوڕین و هەردوولا تيشك ئێخسته سه‌ر ئه‌رك و كارێن تيما نه‌ته‌وێن ئێكگرتی و ئاژانسێن وێ ل عیراقێ و هه‌رێما كوردستان.
نێچيرڤان بارزانى، زێدەباری سوپاس و پێزانينان بۆ ڕۆل و پشتەڤانییا نه‌ته‌وێن ئێكگرتی و ئاژانس و ڕێكخراوێن وێ ل عیراقێ و هەڤكارییێن وان د بوار و قۆناغێن جوداجودا دا، ئاماژه ب بزاڤ و كارێن يوونامى كر كو پشتی پرۆسه‌یا ئازادییێ هاریكارییا عیراقێ كریە بۆ ئارامی و پێشڤەبرنا ديمۆكراسى و باشكرنا كارێ سازییان.
ژلایێ خۆ ژی ڤە، ڤۆلكه‌ر پێرسێس ديد و بۆچوونێن خۆ ل دور ئەركێ يوونامى ل عیراقێ و داخوازییێن عیراقێ بۆ پێداچوونێ ب ئه‌ركێ هنارتییێ نه‌ته‌وێن ئێكگرتی دیاركرن، هه‌روه‌سا سۆپاسییا سه‌رنج و بۆچوونێن سەرۆكێ هەرێمێ ل دور كار و ئه‌ركێ نه‌ته‌وێن ئێكگرتی و ئاژانسێن وێ بۆ هاریكارییا عیراقێ كر.
د ته‌وه‌رەكێ د‌ى یێ كۆمبوونێ دا، ڕەوشا ناڤخۆ یا هه‌رێما كوردستانێ، دوماهی پێشهاتێن ڕەوشا سياسى یا عیراقێ و دەڤەرێ ب گشتى، هاتنە گوتوبێژكرن.