ل دووڤ لیسته‌یه‌كا كۆڤارا ( سى ئى ئو ) یا ئه‌مریكى، سێ باژێرێن كوردستانێ ل ڕێزێن پێشییێ یێن لیسته‌یا كه‌ڤنترین باژێرێن ئاڤه‌دانێن جیهانی دهێن.
ل دووڤ كۆڤارا ئه‌مریكى كو ئێك ژ مه‌زنترین كۆڤارێن بوارێ بزنسن و رێزبه‌ندییانه، باژێرێ هه‌ولێر ل ڕێزا چارێ، دیلۆك ل ڕێزا 14ێ و كه‌ركووك ژى ل ڕێزا 20ێ د ڕێزبه‌ندییا كه‌ڤنترین باژێرێن جیهانێدا دهێن.
كۆڤارا ئه‌مریكى سه‌باره‌ت هه‌ولێرا پایته‌ختێ كوردستانێ كو شه‌ش هزار سالان پێش زایینى هاتییه ئاڤه‌دانكرن دبێژیت: كه‌لهه‌كا بلند كو د دلێ هه‌ولێرێدا هاتییه دانان، ل سه‌ر گره‌كێ شوونوارییێ كه‌ڤن هاتییه دروستكرن، بۆ پێنج هزار سالان پێش زایینى ڤه‌دگه‌ریت، چیرۆكا مێژووییا ئه‌ربێلا ( هه‌ولێرا دێرین ) بۆ وان ڤه‌دگه‌رینیت، هه‌ولێر كو ل ژێر داگیركه‌رییا ئاشوورى، سه‌لجۆقى و عوسمانییان ده‌ربازبوویه، به‌لگه‌یه‌كه ل سه‌ر فره‌هه‌نگییا نه‌ته‌وه‌یى و ئایینى، كو ئاشوورى، ئه‌رمه‌نى، عه‌ره‌ب، كورد و توركێن عیراقێ دباوه‌شا خوه‌دا دگریت.
سه‌باره‌ت دیلۆكا باكوورێ كوردستانێ ژى دیاردكه‌ت، سێ هزار و 650 سالان پێش زایینى هاتییه دروستكرن، نوكه ب مزگه‌ڤتا خوه یا مێژوویى، كۆچكه‌كا مێژوویى و كه‌لهه‌كا دێرین شانازییێ ب خوه دبه‌ت، كو ژ چه‌رخێ برۆنزى مرۆڤى ل دیلۆكێ ئاكنجیبووینه.
ل دۆر كه‌ركووكێ ئاشكراكر، كه‌ركووكا باشوورێ كوردستانێ كو دوو هزار و 200 سالان پێش زایینى هاتییه دروستكرن، جاران باژێرێ ئه‌ره‌پخا یێ ئه‌كه‌دى و ئاشوورى بوو، كه‌لها وێ هێشتا ب سه‌ر ئاسووده‌ییێدا یا زاله، پارێزگارییێ ل كه‌نیسه‌یه‌كێ دكه‌ت كو چه‌ندین مۆزایك و گۆرێن ب كۆم تێدانه، هنده‌ك كه‌س وه‌سا باوه‌ردكه‌ن گۆرێ دانیال پێغه‌مبه‌رێ جوهییان تێدایه.