سه‌رۆك بارزانى پێشوازى ل بۆریس جۆنسۆن سه‌رۆكوه‌زیرێن پێشتر یێ بریتانیا كر.
سه‌رۆك مه‌سعوود بارزانى ل پیرمام پێشوازى ل بۆریس جۆنسۆن سه‌رۆكوه‌زیرێن پێشتر یێ بریتانیا و شاندێ دگه‌لداكر.
وه‌كو دڕاگه‌هاندنا باره‌گایێ بارزانیدا هاتى، بۆریس جۆنسۆنى خۆشحالییا خوه ب دیدارا سه‌رۆك بارزانى ده‌ربرى و په‌سنا ڕۆلێ سه‌رۆك بارزانى د به‌رهنگاربوونا تیرۆرێ و ئاماده‌بوونا وى ل به‌ره‌ریێن پێشییێ یێن شه‌ریدا كر، هه‌روه‌سا ئاماژه ب په‌یوه‌ندییێن دۆستانه یێن دناڤبه‌را بریتانیا و هه‌رێما كوردستانێدا كر، دووپاتى ژى ل پێدڤییا به‌رده‌وامبوونا هه‌ماهه‌نگى و پشته‌ڤاتییا هه‌ڤپشك یا هه‌ردوو لایان بۆ به‌رده‌وامبوونا پێشڤه‌برنا په‌یوه‌ندییان كر.
ئاماژه ب هندێ ژى دا، سه‌رۆك بارزانى پشتى بخێرهاتنا بۆریس جۆنسۆنى، سوپاسییا بریتانیا بۆ ڕۆلێ وى یێ بلند د به‌رهنگاربوونا تیرۆرێدا كر، ب وێ دیتنێ كو هێشتا مه‌ترسییا هزر و ئادۆلۆژیا داعشێ مایه كو ب شه‌رێ سه‌ربازى ب دووماهى نه‌هات، هه‌روه‌سا ئاماژه ب هندێ دا، هێشتا مه‌ترسییێن تیرۆرستێن داعشێ گه‌فان ل سه‌قامگێرییا ده‌ڤه‌رێ دكه‌ن.
بابه‌تێ په‌یوه‌ندییێن دناڤبه‌را حكومه‌تا فیدرالى و حكومه‌تا هه‌رێما كوردستانێدا ته‌وه‌ره‌كێ دییێ كۆمبوونێ بوو، هه‌ردوو لایان دووپاتى ل گرنگییا چاره‌سه‌ركرنا هه‌موو ئاریشه‌یان ل دووڤ ده‌ستوورى و ل سه‌ر بنه‌مایێ ته‌وافق و هه‌ڤه‌سه‌نگى و شه‌راكه‌تێ كر.