سه‌رۆكێ هه‌رێما كوردستانێ كۆمبوونا ل گه‌ل سه‌رۆكێ فره‌نسا ب كۆمبوونه‌كا باش لقه‌له‌مدا و ئاماژه ب وێ چه‌ندێ كر كو سه‌رۆك ماكرۆن ل سه‌ر داخوازنامه‌یا وى بۆ سه‌ره‌دانا هه‌ولێرێ رازى بوو.
سه‌رۆك نێچیرڤان بارزانى به‌رى ده‌مه‌كێ كێم د پرێس كۆنفرانسه‌كێ دا ژ پاریس راگه‌هاند "مه دوپاتى ل سه‌ر چاره‌كرنا كێشه‌یێن هه‌ولێر و به‌غدا ب رێكا دیالۆگێ كر، كۆمبوونا من ل گه‌ل سه‌رۆكێ فره‌نسا یا باش بوو و من داخوازنامه‌یه‌ك دا ماكرۆنى بۆ سه‌ره‌دانا هه‌رێما كوردستانێ و وى ژى قه‌بویلكر".
ل دۆر بابه‌تێ راوه‌ستیانا هنارتنا په‌ترۆلا هه‌رێمێ گۆت "توركیا ئاماده‌یى نیشاندایه بۆ هنارده‌كرنا په‌ترۆلا هه‌رێما كوردستانێ و ده‌ستپێكرنا هنارتنێ ل سه‌ر ئیراقێ مایه، هنده‌ك رێكار ماینه كو پێدڤیه بهێنه هاڤێتن، كێشه نه‌یا سیاسى يه به‌لكو ته‌كنیكى یه و پێدڤیه چاره‌سه‌رى بۆ بهێته دیتن كو ب نزیكى 5 ملیار دۆلاران زیان ب ئیراقێ كه‌فتینه ژ به‌ر راوه‌ستیانا هنارتنێ".
ديار ژى كر؛ فره‌نسا هاریكارا سه‌ره‌كى یا ئیراقێ یه، سه‌رۆك ماكرۆن به‌رهه‌ڤى نیشاندانا بۆ هاریكاریێ د چاره‌كرنا كێشه‌یێن هه‌ولێر و به‌غدا دا.
ده‌رباره‌ى هه‌لبژارتنێن هه‌رێما كوردستانێ خۆیاكر "پێگيریا خۆ بۆ ئه‌نجامدانا هه‌لبژارتنێن هه‌رێما كوردستانێ مه بجهئینا و د ڤێ حه‌فتیێ دا دێ ل گه‌ل ئێكه‌تیێ كۆمبین و ب چ شێوه‌یان ل گه‌ل پاشئێخستنا هه‌لبژارتنان نینین".
سه‌باره‌ت مووچه‌یان گۆت "حكومه‌تا هه‌رێمێ هه‌مى داتا ب رێكوپێكى داینه به‌غدا و به‌غدا چ به‌هانه نینن مووچه‌یێن فه‌رمانبه‌رێن هه‌رێمێ نه‌هنێریت و نابیت مووچه‌یێن فه‌رمانبه‌ران بمینیت وه‌ك نووچه‌یێ میدیایان".
ل دۆر ئالۆزیێن دناڤبه‌را حه‌ماس و ئیسرائیلێ دا، سه‌رۆكێ هه‌رێمێ گۆت "د ده‌مێ درێژخایه‌ن دا، چاره‌سه‌ریا دو ده‌وله‌تان تاكه چاره‌یه و شه‌ڕ و شێوازێ له‌شكه‌رى كێشه‌یا فله‌ستینێ و ئیسرائیلێ چاره ناكه‌ت".
زێده ژى كر "مه نه‌ڤێت ئیراق ببیته لایه‌نه‌ك د كێشه‌یا غه‌زه دا و پێدڤیه هاریكاریێن مرۆڤایه‌تى بگه‌هنه غه‌زه و ئاگربه‌ست بهێته راگه‌هاندن".
دیار ژى كر "هنده‌ك گرۆپێن چه‌كدار ل ئیراقێ یێن درۆنان دهاڤێنه سه‌ربازگه‌ها عه‌ین ئه‌سه‌د چ خزمه‌تێ ناگه‌هیننه ئیراقێ به‌لكو پێدڤیه ئیراق بزاڤ بكه‌ت بێ لایه‌ن بیت د كێشه‌یێ دا".