ئاکرێ نیوز
پارتى دیمۆكراتى كوردستان رادگه‌هینیت، ره‌وشا ناوچێ گه‌له‌ك تكچوویه و پێشبینیا هه‌ژیانه‌كا مه‌زن دهێته‌كرن.
په‌یڤدارێ پارتى دیمۆكراتى كوردستان، مه‌حموود محه‌مه‌د راگه‌هاند، ره‌وشا ئیراق و ناوچێ ب شێوه‌یكى تێكچوویه كو پێشبینى هه‌ژیانه‌كا مه‌زن دهێته‌كرن، دڤێ ره‌وشێ دا به‌رپرسایه‌تیا سه‌رملێن هه‌موو هێز و ئالیێن ئیراقى ب گشتى و ئالیێن پێكهێنه‌رێن هه‌ڤپه‌یمانیا برێڤه‌برنا ده‌وله‌تێ ب تایبه‌ت، هوورتر هه‌لسه‌نگاندنێ بۆ ره‌وشێ بكه‌ن ب تایبه‌ت روودانێن پشتى بڕیارا دادگه‌ها فیدرالى یا ئیراقێ ده‌رباره‌یى لادانا سه‌رۆكێ ده‌سهه‌لاتا یاسادانانێ ئالۆزیان زێده‌تر و كوورتر دكه‌ت.
په‌یڤدارێ پارتى دبیژیت: ئه‌ڤه دده‌مه‌كى دایه چاڤه‌ڕێى هندێ بووین ئه‌و ئالۆزى و كێشه‌یێن هه‌ین بهێنه چاره‌كرن نه‌كو بابه‌تێن زێده‌تر ل سه‌ر بهێنه تێكڤه‌دان ب جۆره‌كى ئاشتیا جڤاكى و سه‌قامگێریێ بێخنه مه‌ترسیێ.
هه‌روه‌سا دیار دكه‌ت، پارتى ته‌ماشه‌یى ره‌وشێ دكه‌ت و دلگرانا ئالۆزیێن سیاسى یه، ژبه‌ر ڤێ یه‌كێ ب پێدڤى دزانیت ره‌وشا ئیراقێ ژ روویێ سیاسى، ئێمناهى و ئابۆرى ڤه دڤێت ئه‌گه‌رێن چاڤه‌ڕێكرى یێن ناوچێ ل پێش چاڤ وه‌رگریت و به‌رپرسیارانه پێنگاڤان بهاڤێت بۆ رێكخستنا ره‌وشێ ژ روویێ ده‌ستوورێ هه‌رده‌مى و بجهئینانا مادده و برگه و پره‌نسیپێن رێككه‌فتنێن ئیداره‌یا ده‌وله‌تێ و كارنامه‌یا حكومه‌تا فیدرالى ب تایبه‌ت بڕگه‌یێن پێدڤى ب جڤاتا فیدرالى و دادگه‌ها فیدرالى.
ئاشكراكر، دڤێت ڤه‌گه‌ڕین بۆ بنه‌مایێن ئاڤاكرنا ئیراقه‌كا نوو، شه‌راكه‌ت، ته‌وافق و ته‌وازن و سه‌روه‌ریا ه‌ستوورى بهێته چه‌سپاندن كو تاكه زامنا پێكڤه‌ژیان و سه‌امگیریێ و پێكڤه‌یێ یه ل ئیراقێ.