ئامیرێ پشكنینان كوالیتى و بهایێ دروست یێ ده‌رمانان ل به‌هرا پتر یا ده‌رمانخانه‌یێن هه‌رێما كوردستانێ هاتییه دانان، كو ژ ئه‌گه‌رێ وى ئامیره‌ى ئاسانكارى د نیاسینا ده‌رمانێن سه‌خته و بهایێ نه‌قانوونیدا هاتییه كرن، رێڤه‌به‌رێ كوالیتییا كۆنترۆلا ده‌رمانان ژى دبێژیت : ل سالا نوو چ ده‌رمان بێى ستیكه‌رێ فه‌رمى ل بازارى ناهێنه فرۆتن.
نوكه زێده‌تر ژ 14 هزار جۆرێن ده‌رمانان هه‌نه كو ستیكه‌رێ نوو پێڤه‌یه، وه‌لاتى دشێن ب رێكا مۆبایلێن خوه ب زمانێن كوردى، عه‌ره‌ب و ئنگلیزى پشكنینێ بۆ كۆمپانییا هاورده و كۆالیتی و بهایێ ده‌رمانى بكه‌ن، هه‌روه‌سا كوالیتییا كۆنترۆلا ده‌رمانى هێله‌ك دانایه، نه‌خۆش دشێت ل هه‌ر كارتێكرنه‌كا خراب یا ده‌رمانان وان ئاگه‌هدار بكه‌ت و ئه‌وژى دێ دووڤچوونێ كه‌ن.
هه‌ر كۆمپانی، كۆگه‌هـ و ده‌رمانخانه‌یه‌كا پابه‌ندى ستیكه‌رێ نوو یێ ده‌رمانى نه‌بیت، دێ ب دوو ملیۆن هه‌تا 10 ملیۆن دیناران هێته سزادن، هه‌روه‌سا هه‌تا سالا نوو دڤێت 390 كۆمپانییێن هاورده‌كرنا ده‌رمانان، 147 كۆگه‌هـ و 1782 ده‌رمانخانه پابه‌ندى ئه‌ڤێ بریارێ بن.