داستانا سحێلا، داستانەکا دی بوو ژ وێ سەرکەفتنا مەزنا کورد و کوردستانێ و پێشمەرگەی کۆ ژ 26ێ ئۆکتۆبەرا 2017 تاما شکەستنێ نیشا دوژمن و داگیرکەرێن کوردستانێدا و سەرکەفتنەکا تژی شانازی بوو بۆ مانەڤا گەلێ خۆنەچەمین و پاراستنا قەوارا ھەرێما کوردستانێ . ئه‌ڤرۆ پێنجشەمبی 26ێ ئۆکتۆبەرێ 2023، شەش
ساڵ ب سه‌ر داستانا سحێلا دەربازبوون، سه‌ركه‌فتنا وێ رۆژێ بوویە سیمبولا خه‌بات و به‌رخودانا پێشمه‌رگه‌ی و مانا گه‌لێ كوردستانێ و هیڤییەکا نوی دا خه‌لكێ كوردستانێ و هەتا نوکەژی به‌رده‌وام ناڤێ وێ داستانێ ل سه‌ر زارێ تاكێن كورد دهێتەگوتن.
پشتی 16ێ ئۆکتۆبەرا 2017 میلیشیایێن حەشدا شەعبی وەسا دانابوو کۆ دشێن ژ هندەک ئالیان هێرشێ بکەن و بێ شەر بێنە ناڤ هەرێما کوردستانێ، بەلێ تووشی شکستنەکا مەزن بوون و سیاسەت و خواندنا هویربینانەیا سەرۆك بارزانی و بەرگرییا قەهرەمانا هێزا پێشمەرگێ كوردستانێ و جەماوەرێ پارتی دیموكراتی كوردستان و دڵسوزێن ڤێ ئاخێ شیان وانەیەكا باش بدەنە داگیركەر و دووژمنان.
د وێ رۆژێدا هێزێن داگیرکەر ب مووشەك و كاتیۆشا و هاوەن و تۆپێن گران و سڤك، سەنگەرێن بەرگریێن پێشمەرگەی ب دژواری بۆردومان كرن، پاشی ب تانکێن ئەبرامزێن ئەمریكی و T72یێن رووسی و زرێپۆش و باجیڕۆ و هەمەران هێرش كرن سەر سەنگەرێن پێشمەرگێن كوردستانێ، بەلێ پێشمەرگێن پارتی و بارزانی، پارێزەرێن گەل و ولاتی، بەرسینگێ داگیركەران گرت و د شەرەکێ دەستەویەخەدا ب درووشمێ ''كوردستان یان نەمان'' هێزا داگیركەران شكاند و زەرەر و زیانێن ژیانی و ماددیێن مەزن گەهاندنە داگیركەران و نەچار کرن داخازا دانوستان و گۆتۆبێژان بكەن، بڤی شێوەی سەركەفتنا سحێلا وەكوو داستانێن دی، سەركەفتنا پێشمەرگەی د تۆمارا بزاڤا رزگاری خوازا كوردستانێدا تۆمار كر.
د وێ داستانیدا گەلێ کورد ب ڕابەراتییا سەرۆک بارزانی، دیرۆکا خۆنەچەماندنێ ئێخستە ناڤ خەباتا فیداکارییا خۆ و داستانا سحێلا ب فەرماندەییا فەرماندێ دوژمن بەزێن، مەنسوور بارزانی، ئەو سەرکەفتنا مەزن خولقاند و ل ویرێ ب ھەموو پێشمەرگەهان گوت: ''خوینا من ل خوینا وە عەزیزتر نینە، گەر دوژمن لێرە دەرباز ببیت، مان و نەمانا مەیە.''