ئه‌ڤرۆ ئێكشه‌مبی، ده‌زگەهێ خێرخوازیێ بارزانی بەڵاڤکر، شاندەكێ دەزگەهێ خێرخوازیێ بارزانی (BCF)، رۆژا 18ێ 10ێ 2023، ب سەرۆكایەتیا موسا ئەحمەد، سەرۆكێ دەزگەهی ل هەولێرێ سەردانا كۆنسولگەرییا فەڵەستینێ كر و دگەل نەزمی حەزووری، كۆنسولێ گشتیێ فەڵەستینێ كۆمبوو و تێدا ئامادەییا دەزگەهی نیشاندا بۆ هندێ کۆ هاریكارییا مرۆڤی رەوانەی فەڵەستینێ بكەن.
د رونشتنێدا كۆنسولێ گشتیێ فه‌ڵه‌ستینێ، سوپاسییا ده‌زگەهێ خێرخوازیێ بارزانی كر ل هه‌مبه‌ر خزمه‌تێن وان بۆ ئاواره و په‌نابه‌ران ب گشتی و ئاوارێن فه‌ڵه‌ستینییان ب تایبه‌تی كۆ د سالا 2014 بۆ 2017 دا د به‌شێن دی یێن عێراقێ ئاواره‌ی هه‌رێما كوردستانێ بوونە.
ئه‌و ژی دیارکر، هەر د وێ هەڤدیتنێدا، گۆتۆبێژ دەربارێ رەوشا مرۆڤی یا خه‌لکێ فه‌ڵەستین و رێکێن هنارتنا هاریكاریێن مرۆڤی كرن، ژ لایێ خۆڤە سه‌رۆكێ ده‌زگەهێ خێرخوازیێ بارزانی، تەکەز لسەر ئاماده‌ییا ده‌زگەهێ خێرخوازیێ بارزانی بۆ هنارتنا هاریكارییێن مرۆڤی بۆ خه‌ڵكی لێقەومی کر و پابه‌ندییا ده‌زگەهی نیشاندا بۆ هاریكاریكرنا هه‌ر مرۆڤەكێ كو پێتڤی ب هاریكاریێ هەبیت، بێ جوداهی ل سه‌رتانسه‌رێ جیهانێ، ل هەمبەردا كۆنسولێ گشتیێ فه‌ڵەستین بۆ وێ ده‌ستپێشخه‌رییا مروڤی یا گرنگ سوپاسییا ده‌زگەهێ خێرخوازیێ بارزانی كر.
ده‌زگەهێ خێرخوازیێ بارزانی ده‌ستێ هاریكاریێ بۆ لێقه‌وماوێن فه‌ڵه‌ستینێ و دەڤەرێ درێژ کر، ئه‌ڤە ژی درێژەدانا بزاڤێن مروڤیێن ناڤده‌ولەتیێن ده‌زگەهێ خێرخوازیێ بارزانییە بۆ كێمكرنا نه‌هامه‌تی و ئازارێن مرۆڤان، د چارچوڤێ ئه‌ركێن وێنە وه‌كە ئه‌ندامێ شیرەتکارێ تایبه‌ت ل جڤاتا ئابووری و جڤاکی یا سه‌ر ب نه‌ته‌وه‌یێن ئێکگرتی (ECOSOCS). ئاماژه ب وێ ژی دایە، ده‌زگەهێ خێرخوازیێ بارزانی وه‌كە چاوا د دەمێن بوری كارەكته‌رەكێ سه‌ره‌كیێ بەرسڤدانا مرۆڤی بوویه ل وان دەڤەران کۆ تووشی شەر و كاره‌ساتێن سروشتی بوون، بۆ ئڤێ مه‌رەمێ ژی د هه‌ما‌هه‌نگییا به‌رده‌وامدانە دگه‌ل رێكخراوێن مروڤیێن عێراقی و حكومه‌تا عێراقێ، بۆ ئێكخستنا بزاڤان و دیتنا میكانیزمێن هنارتنا هاریكارییان، ب زووترین دەم بۆ زرارمەندێن دەڤەرێ.