ئەڤرۆ چارشەمبی، مەسرور بارزانی، سەرۆکێ حکوومەتا هەرێما کوردستانێ د دەمێ ڤەکرنا قونابخانەکێدا راگەهاند، ل مژارا ریفۆرما کەرتێ پەروەردێ، ڤێ کابینێ گەلەک کار ئەنجامدایە.
سەرۆکێ حکوومەتێ، د دەمێ ڤەکرنا قوتابخانە و باخچێ زاروکان ل ماجیدی یا هەولێرێ، گۆتارەک پێشکێشکر و راگەهاند، ب راستی گەلەک کەیف خوشم کۆ سەرەدانا وە دکەم و ڤێ قوتابخانا رێک و پێک دبینین، جهێ دەست خوشیە و ل هەوە پیروزبیت و ئین شائەڵا جهێ هوسا زۆر ببن و قوتابیێن مەیێن خۆشتڤی د هەمی باژێر و باژێرکێن کوردستانێدا، بشێن ببنە خودانێ قوتابخانەکا هوسا یا رێک و پێک، زۆر سوپاسیا (کاک ئەحمەد) دکەم بۆ چێکرنا ڤێ قوتابخانا رێک و پێک کۆ تەکنەلۆژیا نوی تێدا بکارهاتیە، پۆلێن وێ ب شێوازەکێ زورێ رێک و پێک هاتیە چێکرن، ئەو پێتڤیێن کۆ قوتابیان دڤێن بۆ وان هاتنە جێبەجێکرن.
مەسرور بارزانی گوت ژی، زۆر سوپاسیا مامۆستایێن برێز دکەم کۆ ئەوژی د بەردەوامن ژ فێرکرنا قوتابیێن خوشتڤی، هیڤیدارم نموونێن وەک کاک ئەحمەد و ڤان مامۆستایێن برێز زێدەتر بیت.
سەرۆکێ حکوومەتێ گوت ژی، دزانم کۆ قوتابخانە جهەکە پێتڤیە گەلەک یێ گونجایی بیت، و قوتابی هەست ب ئارامیێ بکەن، تنێ فێربوونا خاندنێ نینە دڤێت قوتابی فێری پەروەردەکرنێ ژی بیت.
سەروکێ حکوومەتێ بەحسا وێ چەندێ ژی کر، کۆ ئەم دزانین کێم و کاسی ل گەلەک جهان هەنە، بەلێ ئەوا کۆ حکوومەتێ د شیاندا هەی دێ بەردەوام بیت ژ چێکرنا قوتابخانێن نوی و نویژەنکرنا قوتابخانێن هەیی، هەتا نووکە زۆر قوتابخانە هاتنە چێکرن و چەندین قوتابخانەژی هاتنە نویژەنکرن.
سەرۆکێ حکوومەتێ ل مژارا ریفۆرما پەروەردێ و كەرتێ پەروەردێ گوت، ڤێ كابینێ كارێن زۆر ئەنجامدانە، جهێ خوەدایە کۆ ئەس سوپاسیەکا تایبەت یا دكتۆر ئالان، وەزیرێ پەروەردێ بكەم كۆ ب راستی نموونا وەزیرێن سەركەفتی بوویە د ڤێ كابینێدا و هەمی ئەركێن خۆ ب ئەمانەت بجهئینایە و یێ بەردەوامە ژی د خزمەتا كەرتێ پەروەردێ و قوتابی و مامۆستایان، ئەس سوپاسییا جەنابێ وەزیر و هەمی ستاف و وان رێڤەبەرا دكەم یێن كۆ ل وەزارەتێ ئەڤ ئەركە هەلگرتیە و بەردەوامن و ب ئەمانەت ئەركێن خوە بجهـ دئینن.
ژ ڤێرێ ئەس سوپاسییا هەمی وان مامۆستێن برێز دکەم كو بەردەوامن ژ فێركرنا قوتابیێن خوشتڤی، دزانم كو رەوشا ژیانا وان یا دژوارە و ساناهی نەبوویە، ب تایبەتی ئەڤ ماوێ بووری كو مژارا مووچەی بوویە مژارەکا سەرەكی یا ئاریشێ، ب تایبەتی یێن كۆ ژ بلی مووچەی، چ داهاتەکێ دی بۆ ژیانا خوە نینە، بەلێ مامۆستا وانا دبێژن، ئەس سوپاسییا هەمی وان مامۆستایێن برێز دكەم.
ئەو مامۆستایێن دی یێن برێز كۆ هەتا نوکە نەشیانە بەردەوام بن ژ خواندن و داخازا مافێن خوە دکەن، من دڤێت پشتەڤانییا خۆ بۆ وان مامۆستایا نیشان بدەم، ئەس ژی دەنگێ خوە دێ ئێخمە گەل دەنگێ وان كۆ پێتڤیە هەمی ماف و شایستێن دارایێن وان بهێته تەرخانکرن، بەلێ رەخنێن مە ژ وان لایەنان ئەڤێن كۆ بونە ئەگەر بۆ قوتکرن یان ژی پاشکەفتنا مووچێن وان، حكوومەتا هەرێما كوردستانێ ئەگەر نینە، حكوومەتا هەرێمێ زۆر یا پەرۆشە بۆ هندێ کۆ ب زووترین دەم مووچێن بهێنە تەرخانکرن، دێ بەردەوام ژی بین بۆ هندێ کۆ پێکڤە داخازا مافێ مامۆستا و هەمی فەرمانبەرێن دی یێن خەلكێ كوردستانێ بكەین.
جهێ داخێ یە کۆ رەنگە هندەك لایەن یاریێ ب هەستێ مامۆستایان بكەن، ئەوێن كۆ نوکە مامۆستایان هان ددەن كۆ نەچنە پۆل و قوتابخانا، دخازن تولڤەکرن ژ وان ئەڤێن کۆ مووچێن وانا قووتکریە ژ قوتابییان بكەن كۆ ئەڤە ژی ب چ جۆرەكێ نەیا رەوایە، پێتڤیە ئێكەم وانا كۆ قوتابی ژ مامۆستایان فێر بیت، وانا كۆلنەدان و بەردەوامبوونە، دڤێت هاریکاریا ئێکو دوو بکەین بۆ هندێ قوتابیێن مە ل دەستپێکێ فێری خۆشتڤیێ بن، فێری كۆلنەدانێ ببن، فێری بەردەوامبوونێ ببن، فێری خۆڕاگریێ ببن، فێری وێ بن كۆ چاوا پێتڤیە د ژیانێدا ب سەربەرزی بمینن و ب چ جۆرەکێ كۆلنەدەن بۆ چ ژ وان ئاریشێن كۆ رۆژانە دهێتە ژیانا واندا.
ئەس ڤێزە داخازێ ژ هەمی لایەنێن سیاسی دكەم، دگەل مە داخازا مافێن مامۆستایا و هەمی خەلکێ كوردستانێ بكەن ژ وان جهێن كۆ مافێن وان بنپێکرینە، حكوومەتا هەرێمێ حكوومەتا وەیە، تشتەك نینە کۆ یا جودا بیت ژ هەوە، د خزمەتا هەوەدایە و دێ بەردەوام ژی بین، وە پشتراست دكەین كۆ ب چ شێوەكێ رێکێ نادەین مافێ چ مامۆستایەكێ ژناف بچیت، دێ هەمی هێنە قەرەبوکرن، بەری ماوەكێ من گوت تەنێ ئەوا کۆ ناهێتە قەرەبووکرن، تاقیكرن و خواندنا زاروویانە لەورا هیڤیدارم مامۆستایێن برێز ڤەگەرنە قوتابخانان و دگەل قوتابیێن خۆشتڤی بەردەوام بن ژ گوتنا وانە و پەروەردەكرنا قوتابییان لسەر بنەمایەكێ ساخلەم.
جارەكا دی سوپاسییا هەوە هەمیان دكەم، پیرۆزباهییا ڤێ قوتابخانا جوان ژ هەوە دكەم، هیڤیدارم هین هەمی سەركەفتی بن و پلێن باش ب دەستڤەبینن.