نێچیرڤان بارزانی، سەرۆکێ هەرێما کوردستانێ، پەیامەک ل دوور ڕەوشا کەرکووکێ بەلاڤکریە و تێدا ڕاگەهاندیە:” پێدڤیە لايه‌نێن په‌يوه‌نديدار یێن حكومه‌تا عیراقا فيدرال ڕێكارێن بلەز و پێدڤی بجهبینن و ئەرکێ هێزێن ئەمنی بێ جوداهی پارێزگارییێ ل ئاسایشا هەمی پێکهاتەیێن کەرکووکێ بکەن و تەقەکەرا بەرهەنگاری یاسایێ بکەن.”
دەقێ پەیاما سەرۆک نێچێرڤان بارزانی:
گرتنا ڕێکا سەرەکي یا هەولێر ـ کەرکووک د دەمێ شەش ڕۆژێن دەربازبووی دا کارەکێ نە یاسایی بوو، ب مخابنیڤە ئەو کارێ نە یاسایی تا نوکە ژ لایێ ئیدارا کەرکووکێ ڤە نە هاتیە لادان، کەکووکێ پێدڤی ب بجهئینانا یاسا و دەستووریە و ب چ رەنگان پێدڤی ب کارێ زێدەتر یێ نە یاسایی نینە!
پشتی کو ئیدارەیا باژێرێ کەرکووکێ ب چ ڕەنگان دوماهی ب ئەوی کاری نە ئینای یێ کو کارتێکرن لسەر ژیانا ئاکنجییێن باژێری ب گشتی کری، وەلاتییێن کورد ل کەرکووکێ ئەڤرۆ نە ڕازیبوون بەرامبەر ڕێگریکرنێ دیارکر، لێ ب مخابنیڤە ب توندوتیژیێ بەرسڤا ئەوان دا و گەنجەک شەهیدبوو و چەندێن دی ژی بریندارن.
د دەمەکیدایە ب دلگرانییا مەزن ڤە ئەڤان ئالۆزییێن ئەمنی د هەلسەنگینین و ب هویری چاڤدێرییا ڕەوشی دکەین، ب توندی ئیدانەیا تەقەکرن و دەستڕێژا چەکی ل بەرامبەر خۆ پیشاندەرێن سڤیل دکەین، دروستکرنا ئالۆزی و تێکدانا ئەمنی ل کەرکووکێ، گەفێن جددی ل پێکڤە ژیان و ئاسایش و سەقامگیرییا دکەت.
پێدڤیە لايه‌نێن په‌يوه‌نديدار یێن حكومه‌تا عیراقا فيدرال ڕێكارێن بلەز و پێدڤی بجهبینن و ئەرکێ هێزێن ئەمنی بێ جوداهی پارێزگارییێ ل ئاسایشا هەمی پێکهاتەیێن کەرکووکێ بکەن و تەقەکەرا بەرهەنگاری یاسایێ بکەن.
بەرپرسیارەتییا هەمی لایەکی یە ئارامی و سەقامگیریا ئەمنی بپارێزن و ڕێکێ نەدەن ب چ بهانەیەکێ ڕەوشا ئەمنی ل کەرکووکێ و سنوورێ ئەوێ پارێزگەهێ ئالۆز ببیت، هەمی لایەک د ئارامبن، ڕێکان ڤەکەن، دا ئارامی و ژیانا ئاسایی بۆ وەلاتییێن کەرکوکێ ڤەگەریت.
نێچيرڤان بارزانى
سه‌رۆكێ هه‌رێما كوردستانێ
2023/9/2