موافق شێخ شهاب، ئەندامێ فراکسیۆنا پارتی دیموکراتی کوردستان د پەرلەمانێ عێراقێ دا راگەهاند، حکومەتا هەرێما کوردستانێ هەموو پابەندیێن خۆ ل یاسایا بودجەی دا جێبەجێکرینە و نوکە چ بهانەیەک بەردەستێ حکومەتا عیراقێ نەمایە بۆ رەوانە نەکرنا شایستەیێن دارایێن هەرێما کوردستانێ.
موافق شێخ شهاب سەرەدانا ڤێ داویێ یا سەروک وەزیرێن هەرێمێ مەسرور بارزانی ژبۆ بەغدا ب "پیرۆز" و "دیروکی" ناڤبر و ئاماژە ب وێ ئێکێ دا لدیڤ وێ سەرەدانێ بیروبۆچوونێن بەرپرس و پەرلەمانتار و لایەنێن سیاسی یێن عیراقێ بەرامبەر مافێن دەستووری و شایستەیێن دارایێ خەلکێ کوردستانێ هاتییە گوهرین کو پێشتر بڤی ئاوایی نەبوو.
سەرەدانا شاندێ بلندێ حکومەتا هەرێما کوردستانێ بۆ بەغدا موافق شێخ شهاب ئاماژە ب وێ چەندێ دا کو ب سەدەما وێ ئێکێ نوێنەرێن زوربەیا حزب و لایەنێن سیاسی یێن کوردستانێ تێدا پشکدربوون، کاریگەریا خۆ هەبوو ل سەرگوهرین و نێرینا بەرپرسێن عیراقێ و ئەنجامێن کومبوونێ زۆر دئەرێنی بوون.