ئاکرێ نیوز
ئه‌ڤرۆ جڤاتا وه‌زیرێن هه‌رێما كوردستانێ دێ ل دۆر به‌لاڤكرنا مووچه‌یێ فه‌رمانبه‌ران و هنارتنا 500 ملیار دیناران كۆم ببیت.
بڕیاره ئه‌ڤرۆ رۆژا چارشه‌مبى، 6-9-2023یێ جڤاتا وه‌زیرێن هه‌رێما كوردستانێ ل دۆر به‌لاڤكرنا مووچه‌یێ فه‌رمانبه‌رێن هه‌رێمێ و هنارتنا 500 ملیار دیناران ژ ئالیێ به‌غدایێ ڤه بۆ هه‌رێمێ كۆم ببیت و دێ بڕیارێ ل سه‌ر به‌لاڤكرن و چاوانیا به‌لاڤكرنا مووچه‌یێ وه‌زاره‌تان ده‌ت.
ل ده‌مه‌كى شه‌ڤێدى وه‌زاره‌تا دارایی یا ئیراقێ راگەهاند: بۆ وێ یەکێ کورتهێنان د دانا مووچەیێن فەرمانبەرێن هەرێمێ دا چێنەبیت، به‌نكێن رافیده‌ین و ره‌شید رازى بوون ب قه‌ر پارا بده‌نه هه‌رێمێ بۆ دانا مووچه‌یان، لێ تا نوكه حكومه‌تا هه‌رێمێ چ هه‌وله‌سته‌ك هه‌مبه‌رى ڤێ داخویانیا وه‌زاره‌تا دارایى یا ئیراقێ دیارنه‌كریه.
مووچه‌یێ مه‌هێن 7 و 8 یێ فه‌رمانبه‌رێن هه‌رێما كوردستانێ ژ ئالیێ حكومه‌تا هه‌ریمێ ڤه نه‌هاتیه دان و ئه‌گه‌ر ژى ڤه‌دگه‌ڕن بۆ نه‌هنارتنا 400 ملیار دینارێن پێشتر رێككه‌فتن ل گه‌ل به‌غدایێ ل سه‌ر هاتیه كرن و نه‌بجهئینانا قانوونا بودجه‌یا ئیراقێ ژى ئه‌گه‌ره‌كێ دى یێ گیرۆكرنا مووچه‌یانه.