صەباح زوهێر زێباری
ئەڤرۆ 62 سال ب سەر شورەشا ئیلۆلێ دا دەربازبوون ئەو شورەشا کو ل ۱۹٦۱/۹/۱۱ ئێکەم چریسکا نەتەوەی هەلکری و بوویە وەچەرخانەکا نوی دبزاڤا رزگاریخوازیا گەلێ کوردستانێ کو بۆ ئێکەمین جار ب شێوەکێ نوی و جودا شورەشەکا ب ڤی رەنگی دەستپێکری بۆ دەستڤەئینانا دەستکەفتێن نەتەوەیێن مللەتێ کورد.
جوداهیا ڤێ قوناغێ و ڤێ شورەشێ ئەوبوویە کو هەمی شورەشێن بەری وان رەنگە ل سنورەکێ چارچوڤەکریدا خەبات کریە یان تایبەت ب دەڤەرەکێ ڤە بوویە، لێ ڤێ شورەشێ مەزنایەتی پێڤە دیاربوو و سنورەکێ مەزنتر ژ هەمی شورەشێن دی هەبوویە، ئەو ژی ژ زاخۆ تا خانەقین بێ جوداهیا سنورێن جوگرافی و عەشیرەتی و ئولی و کرمانجیا خارێ و یا سەری و تەخایەتی و رەگەزی بوویە، تنێ وان ئێک دروشم هەبوویە ئەو ژی دروشمەکێ نەتەوەی و دیموکراسی بوویە،ئەڤ چەندە ژی پێخەمەت مان و بهێزبوونا مافێن نەتەوەی یێن گەلێ کوردبوویە، لەوما پشتی ۱٤ سالان ژ خەباتێ پیلانا قۆچا رەشا (۷٥)ێ چریسکا شورەشێ هاتە ڤەمراندن و شورەش ب داوی هات و لێ کوردایەتی ونەتەوایەتی هەر ما و دێ هەرمینیت ژی.
راستە پیلانا(۷٥) برینەکا کویر و دژواربوو،لێ ئیرادا گەلێ کورد هەر یا بهێز بوو، لەوما پشتی ژناڤچوونا شورەشا ئیلولێ جارەکا شورەشا گۆلانێ ل ۱۹۷٦/٤/۲٦ دەست پێکر کو ئەڤە ژی بەردەوامیا شورەشا ئیلۆلێ بوویە،بەردەوامی و ئێک دویڤ ئێک یا دروستبوونا ڤان شورەشان ئاماژە بۆ ئیرادە و هێزا نەتەوەیی یا مللەتێ کورد دزڤریت کو هەردەم شیاینە دژی دوژمن و پیلان گێران ب راوەستن و ژ شکەستن و بێ هیڤی بوونێ نەترسیاینە.