نێچیرڤان بارزانی، سەرۆكێ هەرێما كوردستانێ د سالڤەگەرا 62 سالییا شۆڕەشا ئیلۆنێ دا پەیامەك بەلاڤكر و تێدا ڕاگەهاند، شۆڕەشا ئیلۆنێ ، دایكا شۆڕەشێن كوردستانێ یە كو بوویە هەلگرا بەهایێن بلند یێن گەلەكێ ستەملێكری و تێهنییێ ئازادی و سەرفەرازییێ.
دەقێ پەیاما سەرۆكێ هەرێمێ:
د سالڤەگەرا 62 سالییا شۆڕەشا مەزن یا ئیلۆنێ دا، سلاڤان بۆ گیانێ پاك یێ ڕابەرێ شۆڕەشێ بارزانییێ نەمر و هەموو خەباتگێڕ و پێشمەرگێن قەهرەمان دهنێرین كو ل پێناڤی ئازادییا گەل و وەلاتی گیانێ خۆ بەخشی و د ڕێیا سەخت و دژوار یا شۆڕەشێ دا ڕەنج و ماندیبوون كێشاین. ب ڕێزڤە وان ل بیرا خۆ دئینین.
شۆڕەشا ئیلۆنێ، دایكا شۆڕەشێن كوردستانێ یە كو بوویە هەلگرا بەهایێن بلند یێن گەلەكێ ستەملێكری و تێهنییێ ئازادی و سەرفەرازییێ. بوویە ناسناما نەتەوەی و كەلتووری یا هەموو پێكهاتێن گەلێ كوردستانێ. بوویە هیڤی و ئومێدەكا مەزن، ئاگەهی و هەست و هوشیارییا نەتەوەی زیندی كریە. بوویە دۆز و داخوازا مافێن ڕەوا یێن گەلەكی كو ب ئێكڕێزی و تەبایی، ئامادەی هەموو قۆربانیدانەكێ بوویە تا بگەهیتە سەركەفتنێ وئارمانجێن خۆ یێن ڕەوا و دەنگێ خۆ ب هەموو جیهانێ گەهاند.
گەلێ كوردستانێ د شۆڕەشا مەزن یا ئیلۆنێ دا ب باوەری و بەرهەنگاری و گیانفیدای و قۆربانیدانێ، ئێك ژ مەزنترین ڕژێمێن خویناوی یێن دەڤەرێ شكاندن و نەچاركرن دانپێدانێ ب مافێن وان بكەت. سەرەڕای ئاستەنگێن نەیاران ل دژی شۆڕەشێ، ئاگرێ شۆڕەشێ قەت نەهاتە ڤەمراندن و دەستكەفتێن شۆڕەشێ بوونە بنیاتێ هەموو دەستكەفت و مافێن دەستووری یێن گەلێ كوردستانێ.
كا چەوا ئێكڕێزی و تەبایی، هێز و بنەمایێ شۆڕەشا ئیلۆنێ بوو، د ڤێ یادێ دا دۆپاتییێ ل ئێكڕێزی و تەبایی و ئێكدووقەبوولكرنێ و هاریكارییێ دناڤبەرا هەموو هێز و لایەن و پێكهاتێن گەلێ كوردستانێ دا دكەین. ئەڤە تاكە ڕێكە بۆ دەربازكرنا ئاستەنگ و مەترسییان و پاراستنا فیدڕالی و ماف و دەستكەفتێن دەستووری یێن هەرێما كوردستانێ و دروستكرنا نوكە و داهاتوویەكا باشترە بۆ گەلێ كوردستانێ.
سلاڤ بۆ گیانێ پاك یێ شەهیدێن شۆڕەشێ و هەموو شەهیدێن ڕێیا ئازادییێ