پۆلیسین ئیراقێ راگه‌هاند،پشتى ڤه‌گه‌ڕیانا ئارامیێ، سپێده‌هیا ئه‌ڤرۆ ئێكشه‌مبێ قه‌ده‌غه‌یا هاتنوچونێ ل كه‌ركووكێ هاته راكرن.
پۆلیسێن كه‌ركووكێ ئه‌ڤرۆ سپێدێ د به‌یاننامه‌یه‌كێ دا راگه‌هاند، پشتى ئالۆزیێن شڤێدى یێن كه‌ركووكێ قه‌ده‌غه‌یا هاتنوچونێ ل وى باژێرى هاته راگه‌هاندن، پشتى ئاسایبوونا ره‌وشێ ژى ئه‌ڤرۆ سپێدێ قه‌ده‌غه هاته راكرن.
چه‌ندین رۆژه رێكا سه‌ره‌كى یا دناڤبه‌را هه‌ولێر و كه‌ركووكێ دا ژ لایێ عه‌ره‌ب و تركومانێن ئالیگرێن حه‌شدا شه‌عبی ڤه هاتبوو گرتن. دوهى ئێڤارى بده‌هان گه‌نجێن كورد وه‌كو نه‌رازیبوون همبه‌ر گرتنا وێ رێكێ ده‌ست ب خۆنیشادانان كر، لێ راستى ته‌قه‌یا هێزێن ئێمناهیا ئیراقێ بوون.
د خۆنیشادانان دا سێ گه‌نجێن كورد شه‌هیدبووینه ب ناڤێن (هاوکار عەبدوللا، هەڤال ستار و سەمەد محەممەد) 12 خۆنیشاده‌ر ژى برینداربووینه كو برینێن هنده‌ك ژ وان گرانن و ل ژێر چاڤدێریا چڕ دانه، ب ده‌هان گه‌نج و وه‌لاتیێن دى ژى ل تاخێن كوردنشینێن كه‌ركووكێ ژلایێ هێزێن ئێمناهیێ ڤه هاتینه گرتن و لێپرسین دگه‌ل دهێته كرن.