به‌رپرسێ فه‌رمانگه‌ها په‌یوه‌ندیێن ده‌رڤه یا حكومه‌تا هه‌رێما كوردستانێ راگه‌هاند، هه‌رێم دخوازیت په‌یوه‌ندێن خۆ دگه‌ل رۆسیا پتر پێشڤه ببه‌ت ب تایبه‌تى د وارێن ئابۆرى و تێهنێ دا.
سه‌فین دزه‌یی د چارچووڤێ پشكداریا وى د كۆمبوونێن ئاست بلندێن كۆمه‌له‌یا گشتى یا نه‌ته‌وه‌یێن ئێكگرتى دا ل نیویۆركێ ل دۆر په‌یوه‌ندیێن هه‌رێما كوردستانێ و رۆسیا گۆت: په‌یوه‌ندیێن هه‌ر د‌و ئالییان دیرۆكینه و بۆ چه‌ندین سه‌دسالان ڤه‌دگه‌ڕن. دیاركر ژى، د سه‌قایێ سیاسیێ نها دا هه‌رێمێ و رۆسیا په‌یوه‌ندیێن باش و سه‌قامگیر هه‌نه.
دزه‌یی گۆت ژى، دشیاندایه په‌یوه‌ندیێن دناڤبه‌را هه‌رێمێ و رۆسیا دا پتر پێشڤه بچن، ب تایبەتى د وارێ ئابۆرى دا لێ دبیت سه‌قایێ سیاسیێ نها ئاسته‌نگان همبه‌ر ڤێ پێشڤه‌چوونێ دروست بكه‌ت.
گۆت ژى، پیشتر وه‌به‌رهێنانه‌كا به‌رفره‌هـ یا كۆمپانیێن رۆسى ل هه‌رێمێ هه‌بوویه، دشیاندایه ل پاشه‌رۆژێ وه‌به‌رهێنانێ ده‌ست پێ بكه‌ته‌ڤه و هه‌موو ئالیه‌ك د سه‌قامگیرى و پێشڤه‌چوونێ دا بیت.