ئاکرێ نیوز
به‌رپرسێ نڤێسینگەها ڕێکخەرێ ڕاسپاردێن نێڤدەوله‌تی یا حکومەتا هەرێمێ راگه‌هاندنه‌ك بۆ ڕایا گشتی به‌لاڤكر.
د. دیندار زێباری” به‌رپرسێ نڤێسینگەها ڕێکخەرێ ڕاسپاردەیێن نێڤدەوله‌تی ل حکومەتا هەرێما کوردستانێ، پشتى شەهیدبوونا چار وه‌لاتی یێن کورد و ده‌سته‌سه‌ر كرنا هژماره‌كا وه‌لاتی یێن كورد د خۆنیشاندانێن 2 ى ئیلۆنا 2023 ێ،ڕاگه‌هانده‌ك بۆ ڕایا گشتی به‌لاڤكر و تێدا هاتییە، هه‌تا نوکە 40 وەلاتییێن کەرکووکێ ژ ئالییێ هێزێن عیراقیڤە هاتینە گرتن و چارەنڤیسێ وان ژی نه یێ دیارە.
لدووڤ وێ بەیانناما نڤێسینگه‌ها راسپاردێن نێڤده‌وله‌تی، پشتی خۆنیشاندانێن وەلاتییێن کورد ل کەرکووکێ ب ئارمانجا ڤەکرنا رێیا هەولێر – کەرکووکێ، هێزێن عیراقی دەست ب گرتنا وان گەنجان کرییە یێن كو پشکداری د خۆنیشاندانان دا كری و هه‌تا نوکە 40 وەلاتی هاتینە گرتن و چارەنڤیسێ وان ژی نه یێ دیاره.
هەروەسا گۆتییه، د وان خۆنیشاندانان دا 14 وەلاتی بریندار بووینه و هژمارەکا وەلاتییێن دی ژی هاتینە بەربارانکرن و بریندار بووینە.
نڤێسینگەها راسپاردەیێن نێڤدەولەتی ئاشكرا كر ژی، نوکە رێک هاتینە ڤەکرن، به‌لێ چەند ئالی ب هەمەر و کەلوپەلێن سەربازیڤە چووینە سەر مالێن کوردان و لدووڤ ناسناما وان کوردان د گەرن یێن كو پشکداری د خۆنیشاندانان دا كرین و ئەڤە دژی دەستووری و هەموو بنەمایێن پێکڤە ژیانێیە.
هه‌روه‌سا وێ نڤێسینگەهێ داخواز ژ هەموو ئالییێن نێڤدەولەتی و نەتەوێن ئێکگرتی و رێکخراوێن نێڤدەولەتی دکەت چاڤدێرییا رەوشا کەرکووکێ بکەن.