ئەڤرو رۆژا دووشەمبی 14 / 8 مەسرور بارزانی جێگرێ سەرۆکێ پارتی دیموکراتی کوردستان ، ل باژێرێ دهۆک سەردانا مەکتەبا ڕێکخستنا پارێزگاها دهۆکێ دا و ژلایێ د.پشتیوان سادق ئەندامی مەکتەبا سیاسی و بەرپرسێ مەکتەبا ڕێکخستنا پارێزگاها دهۆکێ و ئەندامێن مەکتەبێ پێشوازی لێ هاتەکرن.
پاشرا د کۆمبوونەکێ دا ، جێگری سەرۆکی پارتی، ئاماژە ب گرنگیا زێدەترا تێکەڵبوونا بەرپرس و کادیر و ئەندامێن پارتی دگەڵ خەڵکی کر بۆ وێ چەندێ ل نزیک هایداری خواست و داخوازی و پێتڤیێن جەماوەری بن و ببنە هاریکار و یارمەتیدەر بۆ سازیێن حکومەتێ بۆ وێ ئێکێ بکارین ب باشترین رەنگ کارنامەیا خزمەتگوزاریان بهێتە جێبەجێ کرن.
جێگرێ سەرۆکێ پارتی دووپاتی ل وێ چەندێ کر کو پارتی، خودانێ سەرۆکەکێ مەزن و ڕابردوویەکێ پڕی شازی یە و پارتا وی پێشرەوێ بزاڤا ئازادیخوازیا کوردستانێ و پارێزەرێ دەستکەڤتێن نیشتمانی و قەوارەیا هەرێما کوردستانێ یە، بوویە دڤێت سەرکردە و ئەندام و لایەنگێرێن پارتی ل ئاستێ مەزناهیا پارتی و دیروکا پڕ سەروەروەریێن وێ بن و خزمەتکارێ میللەتێ خۆ بن و ل خزمەتکرنا خەڵکیدا یا د شیان دابیت کەمتەرخەمیێ نەکەن.
جێگرێ سەرۆکێ پارتی ، ئاماژە ب ڤێ ئێکێ ژی دا کو پارتی حزبەکا کوردستانی و یا هەموو ناوچە و دەڤەرێن کوردستانێ یە، لێ بەلێ بادینان پێگەهەکێ تایبەت هەیە و خەڵکێ ڤێ دەڤەرێ، قوربانیێن زۆر ل پێناڤی بزاڤا ڕزگاریخوازیا گەلی کوردستانێ داینە و هەردەم ب ڕێز و پێزانین ڤە خەبات و قوربانیدانا خەڵکێ بادینان بلند دسەنگینین.