پشتى نێزیكى چار هه‌یڤان ژ راگرتنێ، هنارتن و بكارئینانا پشكه‌كا نه‌فتا هه‌رێما كوردستانێ ده‌ستپێكر و ژێده‌ره‌ك ژ وه‌زاره‌تا نه‌فتا عیراقێ دبێژیت: نوكه رۆژانه زێده‌تر ژ 150 هزار به‌رمیلێن نه‌فتا هه‌رێما كوردستانێ ره‌وانه‌ى پالاوگه‌هێن حوکمه‌تا عیراقێ دهێنه‌كرن.
ژێده‌ره‌كى ژ وه‌زاره‌تا نه‌فتا عیراقێ ئاشكراكر، هنارتنا نه‌فتا هه‌رێما كوردستانێ ب هه‌ماهه‌نگییا وه‌زاره‌تا نه‌فتا عیراقییه و ژ چارچووڤێ قانوونا بودجه‌ی یه، ب ڤێ چه‌ندێ ژى قانوونا بودجه‌ى ژلایێ بابه‌تێ هنارتنا نه‌فتا هه‌رێما كوردستانێڤه 100%ێ چوویه د وارێ بجهئینانێدا و چو ئاریشه نه‌ماینه.
هه‌روه‌سا ئاماژه ب هندێ كر، پشتى ئه‌و رێژه‌یا نه‌فتێ یا كوردستانێ دایه پالاوگه‌هێن ناڤخۆ، فرۆتن و هنارتنا نه‌فتا كه‌ركووكێ ده‌ستپێكر، لێ ئه‌ڤ جاره ب رێكا به‌سره‌یه.
وى ژێده‌رى ل دۆر هنارتنا نه‌فتا كوردستانێ ب رێكا به‌نده‌رێ جه‌یهان یێ توركیا دیاركر، توركیا هه‌تا نوكه ب فه‌رمى به‌رسڤا عیراقێ بۆ ده‌ستپێكرنا فرۆتنا نه‌فتا هه‌رێما كوردستانێ نه‌دایه، لێ چ بهانه نه‌ماینه، عیراق و هه‌رێما كوردستانێ ژلایێ ته‌كنیكیڤه ئاماده‌نه و هه‌موو هه‌ماهه‌نگی كرینه.