سه‌رۆك بارزانى ل پیرمام پێشوازى ل پاتریارك كاردینال لویس ساكۆ سه‌رۆكێ كه‌نیسه‌یا كلدان ل عیراقێ و جیهانێ كر و دووپاتى ل هندێ كر، كوردستان زه‌مینه‌یا پێكڤه‌ژیانێ و ئاشتییێ دناڤبه‌را هه‌موو پێكهاته و نه‌ته‌وه و ئاییناندایه.
باره‌گایێ بارزانى به‌لاڤكر، د دیدارێدا كاردینال لویس ساكۆ سوپاسییا وان رێز و پێزانینان كر یێن ل هه‌رێما كوردستانێ بۆ هێما و كه‌سایه‌تییێن ئاییێن جۆدا هه‌ین، هه‌روه‌سا سوپاسییا فه‌رهه‌نگا پێكڤه‌ژیانێ ل كوردستانێ كر كو بوویه ئه‌گه‌رێ پاراستنا پێكهاته و مێژو و كولتوورێن وان.
هه‌روه‌سا ده‌ستخۆشى ل سه‌رۆك بارزانى كر كو ب حیكمه‌ت و رێبه‌رییا خوه پێكڤه‌ژیان و ئاشتى و ژیانا هه‌ڤپشكا پێكهاته‌یێن جۆدا یێن كوردستانێ پێشخستییه، راگه‌هاند ژى كو شانازییێ ب وێ ژیانا هه‌ڤپشك دكه‌ن یا كو بۆ هه‌موو لایه‌نان ل كوردستانێ هه‌یه.
دپشكه‌كا دییا ئاخڤتنێن خوه‌دا كاردینال لویس ساكۆى به‌حسا بریارا ئه‌ڤێ دووماهییێ یا سه‌رۆككۆمارێ عیراقێ بۆ كێشانا مه‌رسووما سه‌رۆككۆمارى یا تایبه‌ت ب كه‌نیسه‌یا كلدانان كر ، ب بریاره‌كا نه‌دروست و مه‌ترسیدار ل قه‌له‌مدا كو پێكهاته‌یێن كریستیانان بریندار كرن و دژى بنه‌مایێن پێكڤه‌ژیان و ئاشته‌واییێ نه.
هه‌ر دوێ دیدارێدا سه‌رۆك بارزانى بخێرهاتنا شاندێ مێڤان كر و ئاماژه ب هندێ دا ، كوردستان زه‌مینه‌یا پێكڤه‌ژیان و ئاشتییا دناڤبه‌را هه‌موو پێكهاته‌یێن نه‌ته‌وه‌ى و ئاییناندایه، ئه‌وژى ئاشكراكر ل شه‌رێ دژى تیرۆرستێن داعشێ ب شانده‌كێ زه‌لامێن ئایینى یێن كریستیانان راگه‌هاند، كوردستان وه‌لاتێ وانه و نابیت هزر د هێلانا وێدا بكه‌ن، یان دێ پێكڤه سه‌ربلند ل سه‌ر وێ ئاخێ ژین، یان ژى دێ پێكڤه مرن.
هه‌ڤده‌م سه‌رۆك بارزانى دلگرانییا خوه ل دۆر بریارا سه‌رۆككۆمارێ عیراقێ بۆ كێشانا مه‌رسووما سه‌رۆككۆمارییا تایبه‌ت ب كه‌نیسه‌یا كلدان نیشاندا و هیڤى خواستن كو پێداچوونێ د وێ بریارێدا بكه‌ت و راستڤه‌كه‌ت.